Oralda shoqyný meıramynda oıyqtan sý alýǵa kelgen 78 jastaǵy qarııa kóz jumdy

ORAL. QazAqparat – Oralda oıyqqa sý alýǵa barǵan zeınetker kóz jumdy, dep habarlaıdy QazAqparat tilshisi.

BQO TJ departamentiniń baspasóz qyzmeti málim etkendeı, oqıǵa Jaıyq ózeninde adamdar shomylyp jatqan oıyq mańynda boldy.

Er adam sozylmaly syrqatymen esepte turǵan. Sol jerde qutqarýshylar júgirip, qoldan kelgen kómegin jasady.

Oblystyq densaýlyq saqtaý basqarmasy baspasóz qyzmetiniń naqtylaýynsha, saǵat 11.08-de Eski sobor mańyndaǵy oıyq janynda Derkól aýylynyń turǵyny, bas mıynyń aterosklerozymen aýyratyn 78 jastaǵy er adamnyń hali kúrt nasharlaǵan.

Sonda kezekshilik etken jedel járdem brıgadasy barlyq is-áreketti atqarǵanymen, er adamnyń beti beri qaramady.

BQO TJ departamentinen túsken málimetke qaraǵanda, óńirde shoqyný meıramy kezinde barlyq qurylymdyq jáne aýmaqtyq bólimsheler kezekshilik etti.

Turǵyndardyń qaýipsizdigin qamtamasyz etý úshin jeke quramnan 113 qyzmetker, 18 tehnıka, QR TJM «Medıtsınalyq apattar ortalyǵy» memlekettik mekemesi BQO boıynsha fılıalynan 5 adam, 1 tehnıka, BQO polıtsııa departamentinen 103 qyzmetker, 41 tehnıka, jergilikti atqarýshy organdardan 5 adam, 1 tehnıka jumyldyryldy.

Oblys aýmaǵynda 1155 adam shomylsa, sonyń 903-i qalada, 252-si aýdandarda.

Eske sala keteıik, budan buryn BQO-da shoqyný merekesinde sýǵa túsetin arnaıy oryndar belgilengenin jazǵan bolatynbyz.

QazAqparat. Batys Qazaqstan.

--O – E.

Ǵ.Er.

https://kaz.inform.kz/news/bko-da-shokynu-merekesinde-suga-tusetin-arnayy-oryndar-belgilendi_a3741800