Oralda shekarashylarǵa arnalǵan FC-19 júrdek kateri sýǵa túsirildi

ORAL. QazAqparat - Búgin Oralda Shaǵan ózeninde «Oral «Zenıt» zaýyty» AQ-da qurastyrylǵan jańa júrdek kater sýǵa túsirildi, dep habarlaıdy «QazAqparat» tilshisi.

Saltanatty rásimge qatysqan Batys Qazaqstan oblysynyń ákimi Altaı Kólginovtiń atap ótkenindeı, atalmysh zaýyttan jyl saıyn keme shyǵarý ıgi dástúrge aınaldy.

Elimiz táýelsizdik alǵannan bergi shırek ǵasyr ishinde 25 keme shyǵarylsa, bıyl olardyń qataryna taǵy ekeýi qosyldy. Munyń biri sý yǵystyrylymy 250 tonnalyq keme bolsa, búgingi júrdek kater (27 tonnalyq) saǵatyna shamamen 100 shaqyrymdaı júze alady. Osynyń bári Elbasynyń tapsyrmasyna sáıkes qolǵa alynǵan údemeli ındýstrııalandyrý jáne ınnovatsııalyq damý baǵdarlamasy aıasynda óndiris oryndaryn jańǵyrtý baǵytynda júzege asyrylýda.

QR UQK Shekara qyzmetiniń tapsyrysyna sáıkes «Zenıt» zaýyty FC-19 katerin de qazirgi zamanǵy barlyq talaptarǵa saı jasap shyǵardy. Bul elimizdiń shekara qyzmetiniń 25 jyldyǵymen tuspa-tus kelip otyr. Endi ol arnaıy synaqtan ótkizilgennen keıin Kaspıı teńizinde el tynyshtyǵyn kúzetýge septesetin bolady.

Aıta keteıik, jyldam júzip, tez burylatyn atalmysh kater ózenge de kire alady. Ol, ásirese, zańsyz balyq aýlaýmen aınalysatyn brakonerlermen kúres júrgizýde tıimdi.