Oralda Rýhanı jańǵyrý mýzeıi ashylmaq

ORAL. QazAqparat - Oral qalasynda Rýhanı jańǵyrý mýzeıi ashylmaq. Bul týraly M.Ótemisov atyndaǵy Batys Qazaqstan memlekettik ýnıversıtetinde Eýrazııalyq ıntegratsııa ınstıtýtynyń uıymdastyrýymen Elbasynyń «Rýhanı jańǵyrý» baǵdarlamasy aıasynda jasalyp jatqan jumystardy tarazylaǵan dóńgelek ústel otyrysynda oblys ákimi Altaı Kólginov málim etti, dep habarlaıdy «QazAqparat» tilshisi.

Óńir basshysynyń aıtýynsha, bul isti týǵan jer aldyndaǵy perzenttik paryzym dep túsingen jergilikti kásipkerlerdiń kúshimen Dostyq dańǵyly men M.Yqsanov atyndaǵy kóshe qıylysyndaǵy HІH ǵasyrda salynǵan tarıhı ǵımarat mýzeıge laıyqtalyp, qalpyna keltirilmekshi. Bul maqsatqa memleket tarapynan qarjy qarastyrylǵan joq. «Týǵan jer» baǵdarlamasyna sáıkes mundaı jumystar aýdandarda da atqarylýda. Aıtalyq, Qaztalov aýdanynda kásipker Nurlybaı Joldybaevtyń týǵan jeri Taldyapan aýyldyq okrýgine qarasty Saryqudyq eldi mekeninde óz qarajatyna medpýnkt salyp bergenin el biledi. Mundaı bastamalar barynsha qoldaý tabýda. Sol sekildi óńir tarıhyna qatysty jobalar júzege asyrylýda. Mysaly, «Jaıyq Press» JShS (bas dırektory Jantas Safýllın) kóne qulpytastardy zertteý baǵytyndaǵy tyń jumysty qolǵa aldy.

Jıynda aldaǵy ýaqytta josparlanyp otyrǵan joba-bastamalar jóninde de aıtylyp, Eýrazııalyq ıntegratsııa ınstıtýty men M.Ótemisov atyndaǵy BQMÝ arasynda ózara áriptestik jónindegi memorandýmǵa qol qoıyldy.

Aıta keteıik, oblystyq mádenıet, arhıvter jáne qujattama basqarmasynyń basshysy Qadyrbolat Musaǵalıevtiń naqtylaýynsha, Rýhanı jańǵyrý mýzeıinde Alashorda taqyryby da kórinis tabatyn bolady.