Oralda raqymshylyqqa sáıkes túrmedegi adamdy jazasynan bosatý jóninde birinshi is qaraldy

ORAL. QazAqparat - «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týraly» QR Zańyna sáıkes Oral qalalyq sotynda bas bostandyǵynan aıyrý ornynda jazasyn ótep jatqan adamǵa raqymshylyq jasaý týraly birinshi is qaraldy, dep habarlaıdy «QazAqparat» HAA tilshisi.

BQO boıynsha qylmystyq-atqarý júıesi departamentiniń bas mamany mindetin atqarýshy, ádilet maıory Tımýr Dúısálıevtiń aıtýynsha, sot QR QK 200-baby 1-bólimine sáıkes 1 jyl 6 aı 28 kúnge sottalyp, Oral qalasyndaǵy RÝ-170/2 mekemesinde jazasyn ótep jatqan Andreı Portnovty bosatý týraly ótinishti qanaǵattandyrdy.

Sondaı-aq sot qaýlysymen QR QK 378-baby 1-bóligi, 380-baby 1-bóligi, 58-baby 2-bóligi, 60-babyna sáıkes bas bostandyǵy shektelgen A.Melnıkov te jazadan bosatyldy.

Sot qaýlysy zańdy kúshine engen joq.

Eske sala keteıik, atalmysh zańǵa sáıkes oblysta bas bostandyǵynan aıyrý oryndarynda jazasyn ótep jatqan 150 jáne probatsııa qyzmeti esebinde turǵan 610 adamǵa keshirim jasaý kózdelýde.