Oralda páterde taraqanǵa qarsy ý sebilgen: sanepıdemıologtar túsinik berdi
BQO sanıtarııalyq-epıdemıologııalyq baqylaý departamentiniń baspasóz qyzmetinen málim etkenindeı, adamdardyń belgisiz hımııalyq zattarman ýlanýy týraly 22 qańtar kúni saǵat 11.00-de shuǵyl habarlama túsken.
Zardap shekkender arasyndaǵy saýalnamaǵa sáıkes buǵan menshik ıesiniń páterdegi taraqandardy joıý úshin óz betinshe óńdeýi sebep bolǵan.
«Oral qalalyq sanıtarlyq-epıdemıologııalyq baqylaý basqarmasynyń mamandary atmosferalyq aýaǵa zerthanalyq zertteý júrgizdi, nátıjeleri keıin belgili bolady. Kúni búgin zardap shekkenderdiń jaǵdaıy qanaǵattanarlyq dep baǵalandy jáne ambýlatorııalyq baqylaý júrgizilýde. Adamdardyń bulaısha hımııalyq zattarmen top bolyp ýlanýy óńirde bıyl birinshi ret tirkelip otyr. Mundaı jaǵdaılardyń qaıtalanýyna jol bermeý, sondaı-aq halyqtyń densaýlyǵyn saqtaý maqsatynda páterlerde dezınsektsııa, deratızatsııa jáne dezınfektsııa sharalaryn ózdiginshe júrgizbeý suralady. Bul úshin arnaıy jabdyqtary men jeke qorǵanys quraldary bar mamandandyrylǵan uıymdarǵa júgingen jón. Páterdi óńdeýden buryn kórshiles páterlerdiń turǵyndaryna ýaqyty, qaýipsizdik sharalaryn saqtaý týraly habarlaý qajet. Sonymen qatar páterdi óńdeý kezinde qaýipsizdik sharalary týraly aqparat dezınsektsııa, deratızatsııa jáne dezınfektsııaǵa arnalǵan quraldarda kórsetiledi. Sondyqtan satyp almas buryn jáne qoldanar aldynda satýshydan olardyń sapasy men qaýipsizdigin rastaıtyn qujattardy surap, osy quraldardyń qaptamasynyń tańbalanýyna nazar aýdarǵan jón. Qazirgi ýaqytta halyq arasynda osyndaı oqıǵalardyń aldyn alý boıynsha sanıtarlyq-aǵartý jumystary kúsheıtildi», - dep habarlady vedomstvodan.
Eske sala keteıik, budan buryn Oralda páterde taraqanǵa qarsy ý sebilgennen keıin 5 adamnyń aýrýhanaǵa jetkizilgenin jazǵan bolatynbyz.