Oralda «Parkter dırektsııasy» basshysynyń orynbasary qamaýǵa alyndy
BQO sotynyń baspasóz qyzmetinen málim etkenindeı, 2024 jyldyń 6 jeltoqsanynda saǵat 02:15 shamasynda azamat D. kólik quraldaryn basqarýǵa quqyǵy joq bola tura, Oral qalasy, Molodejnaıa kóshesi № 3 úıdiń aýlasynda Toyota avtokóligin júrgizgen.
Ol polıtsııa qyzmetkeriniń alkogoldik, esirtkilik nemese ýytqumarlyq masań kúıin kýálandyrý týraly zańdy talabyn oryndaýdan bas tartqan.
Sot otyrysynda D. óz kinásin moıyndap, mundaı jaǵdaıdyń alǵash ret oryn alǵanyn málimdedi. Ol kólik quraldaryn basqarýǵa quqyǵy joq ekenin túsinip, medıtsınalyq kýálandyrýdan qoryqqandyqtan, polıtsııa talabyn oryndamaǵanyn aıtty.
QR Ákimshilik quqyq buzýshylyq týraly kodeksiniń 613-baby 9-bóligine sáıkes, kólik quraldaryn basqarý quqyǵy joq adamnyń polıtsııa qyzmetkeriniń alkogoldik, esirtkilik nemese ýytqumarlyq masań kúıin kýálandyrý týraly zańdy talabyn oryndamaýy jıyrma bes táýlikke ákimshilik qamaqqa alýǵa ákep soǵady.
Sot azamat D.-nyń quqyq buzýshylyq sıpatyn, jeke basyn, onyń quqyq buzýshylyqqa deıingi jáne odan keıingi minez-qulqyn, sondaı-aq is mán-jaılaryn eskere otyryp, atalmysh kodekstiń 613-baby 9-bóligi boıynsha 25 táýlikke ákimshilik qamaqqa alý jazasyn taǵaıyndady.
— Sot atap ótkendeı, masań kúıde kólik basqarý nemese medıtsınalyq kýálandyrýdan bas tartý jol qozǵalysynyń qaýipsizdigine kesel keltirip, azamattardyń ómirine eleýli qaýip tóndiredi. Ásirese, kólik júrgizý quqyǵy joq adamdardyń osyndaı áreketke barýy erekshe alańdatady. Mundaı quqyq buzýshylyqtar jazasyz qalmaýy tıis. Bul sheshim qoǵamdyq qaýipsizdikti qamtamasyz etýge jáne osyndaı quqyq buzýshylyqtardyń aldyn alýǵa baǵyttalǵan. Qaýly zańdy kúshine endi, — dep habarlady vedomstvodan.
Eske sala keteıik, budan buryn Oralda kásipker áıeldiń jaýapkershilikke negizsiz tartylǵany anyqtalǵanyn jazǵan bolatynbyz.