Oralda para aldy dep aıyptalǵan polıtsııa sheneýnigi 5 jylǵa sottaldy
Oral qalalyq sotynyń baspasóz qyzmetinen málim etkenindeı, polıtsııa sheneýnigi QR QK 24-baby 3-bóligi – 366-baby 2-bóligine (para alýǵa oqtalý) sáıkes aıypty dep tanylyp, 5 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.
Ol sondaı-aq ómir boıyna memlekettik qyzmet atqarý quqyǵynan jáne polıtsııa polkovnıgi sheninen aıyryldy.
Sotta anyqtalǵanyndaı, Oral qalasy polıtsııa basqarmasynyń bastyǵy qyzmetin atqaryp júrgen basshy sheneýnik ótken jylǵy 3 aqpan kúni shamamen saǵat 22.52-de jedel tergeý is-sharalary barysynda A.Cherekaev kóshesi 52-úıdiń aýlasynda Nıkolaı Karpovtan talap etilgen qarjynyń bir bóligi – 450 myń teńgeni (4 mln teńge dep kórsetilgen) alý ústinde qolǵa túsken. Bul qarjyny ol N.Karpovtan zańsyz is-áreketteri úshin alǵan. Atap aıtqanda, esirtkige táýeldi adamdarǵa tramadol jáne basqa psıhotroptyq preparattardy zańsyz ótkizý boıynsha N.Karpovqa qatysty quqyqbuzýshylyqty ashpaý, ony ustamaý, quzyretti organdarǵa ákimshilik jaýapkershilikke tartý úshin materıaldy joldamaý, sondaı-aq jalpy qamqorshylyq kórsetkeni úshin ustalǵan.
E.Bolatovtyń 7 mln teńge kóleminde para alýǵa baǵyttalǵan qylmystyq is-áreketi onyń ózine baılanysty emes mán-jaılar boıynsha aıaǵyna deıin jetpedi.
Sot úkimi kúshine engen joq.
Eske sala keteıik, budan buryn Oral qalasy polıtsııa basqarmasy bastyǵynyń orynbasary para aldy degen kúdikpen ustalǵanyn jazǵan bolatynbyz.
Sondaı-aq Oralda kásipkerdi óltirgen sottalýshynyń biri apellıatsııalyq shaǵym túsirdi.