Oralda orys teatrynda «Jáńgir han» sahnalandy
«Rýhanı jańǵyrý» baǵdarlamasy aıasynda orys tilinde qoıylǵan shyǵarma Táýelsizdik kúnine arnaldy.
Batysqazaqstandyq ólketanýshy Jaısań Aqbaı jazǵan týyndyny teatrdyń bas rejıssery Oksana Malýsha sahnalady. Sýretshisi – Maksım Býdaev.
Spektakl barysynda taqyrypqa qatysy bar keıbir mańyzdy oqıǵalardy teatr ártisi, V.Ermakova atyndaǵy Reseı syılyǵynyń laýreaty Rýslan Djýmahmetov eske túsirip, baıandap otyrdy.
Bir jaǵynda kóteriliske shyqqan Isataı men Mahambet, jelke tusynan patsha otarlaýshylary tónip, eki ottyń ortasynda qalsa da, qolastyndaǵy elin otyryqshylyq pen órkenıetke, bilim alýǵa úndep, alǵa jetelegen Jáńgir hannyń beınesin Anatolıı Gromov somdasa, onyń súıikti hanshasy ári senimdi serigi Fatıma rólinde Natalıa Kopeechkına kórindi. Basqa da ártister qazaq tarıhynda orny bar tulǵalardy sahnaǵa alyp shyǵýǵa tyrysty.
Tarıhı oqıǵalarǵa negizdelgen shyǵarmany sahnalaý úshin rejısser men sýretshi, ártister, jalpy teatr ujymy barynsha eńbektengen. Degenmen olqy soǵyp jatqan tustary boldy, Isataı men Mahambettiń, aqyn rólindegi ártistiń kıimderi de kelińkiremeıdi.
Eń bastysy, 160 jyldyq tarıhy bar teatrdyń qazaqtyń sońǵy handarynyń biri, kúrdeli de qaıshylyqty tulǵa Jáńgirge bet burýy qýantty.