Oral qalasynda bir qabatty óner mektebiniń tóbesi órtendi, dep habarlaıdy QazAqparat tilshisi.
BQO TJ departamentiniń baspasóz qyzmetinen málim etkendeı, oqıǵa 2 qazan kúni Derkól kentinde bolǵan.
«Saǵat 17.46-da N.Bashmakov kóshesi 6-mekenjaıda 5 qabatty turǵyn úıge japsarlas ornalasqan №1 óner mektebi ǵımaratynyń shatyrynda rýberoıdty tóseý kezinde gaz qospasy jarylǵan (qıraýsyz). Jalyn shamamen 40 sharshy metrdi sharpyǵan. Órtke 3 rang berilip, oqıǵa ornyna TJ departamentinen 48 adam jáne 9 tehnıka jetti. Oqıǵa ornyna jetken kezde 3 rang rastalmady, departamentten 9 adam 2 tehnıka jumys istedi. Olardyń jedel áreket etýi nátıjesinde órttiń órshýine jol berilgen joq. Zardap shekkender joq. Tilsiz jaý saǵat 18.00-de oqshaýlanyp, 18.15-te aýyzdyqtaldy. Keltirilgen shyǵyn, órttiń shyǵý sebebi anyqtalý ústinde», - dep habarlady vedomstvodan.
Eske sala keteıik, budan buryn Batys Qazaqstanda 175 tonna pishen órtenip ketkenin jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).