Oralda ógeı qyzyn zorlaǵan áke 20 jylǵa sottaldy

ORAL. QazAqparat - Batys Qazaqstan oblysynda ógeı qyzyn zorlaǵan ákege úkim shyqty, dep habarlaıdy QazAqparat oblystyq sottyń baspasóz qyzmetine silteme jasap.

Batys Qazaqstan oblysynyń qylmystyq ister jónindegi mamandandyrylǵan aýdanaralyq soty azamat P-ny jas balanyń dármensiz kúıin paıdalanyp, seksýaldy sıpattaǵy zorlyq-zombylyq jasaǵany úshin kináli dep tanydy (121-baby 4-bóligimen).

Oral qalasynyń turǵyny P. 2008 jyly týǵan ógeı qyzyna seksýaldyq sıpatta zorlyq-zombylyq jasaǵan. P-nyń kinási jábirlenýshiniń jáne zańdy ókildiń, kýálardyń, sarapshylardyń aıǵaqtarymen, bettestirý, oqıǵa ornyn, zattar men qujattardy qaraý hattamalarymen jáne saraptama qorytyndysymen dáleldengen.

Prokýror P-ǵa 20 jyl bas bostandyǵynan aıyrý jazasyn taǵaıyndaýdy surady. Jábirlenýshi tarap prokýrormen kelisti.

Sottalýshy jáne onyń advokattary qylmys quramynyń bolmaýyna baılanysty aqtaý úkimin shyǵarýdy nemese sottalýshynyń áreketin QK 123-baby 2-bóligine qaıta saralaýdy surady.

QK 121-baby 4-bóliginiń sanktsııasy 20 jylǵa nemese ómir boıyna bas bostandyǵynan aıyrý jazasyn kózdeıdi.

Qylmystyń sıpaty men qoǵamǵa qaýip dárejesin, taǵaıyndalǵan jazanyń sottalǵan adamnyń túzelýine yqpalyn eskerip, sot P-ny 20 jylǵa sottady.

Jazasyn qylmystyq-atqarý júıesiniń barynsha joǵary qaýipsiz mekemesinde óteıdi.

P. pedagogıkalyq jáne kámeletke tolmaǵandarmen jumys jasaýǵa baılanysty qyzmettermen aınalysý quqyǵynan ómir boıyna aıyryldy.

Zańdy ókildiń talap aryzy ishinara qanaǵattandyrylyp, sottalǵannan 7 000 000 teńge mólsherinde moraldyq ótemaqy óndirildi.

Sot úkimi zańdy kúshine enbegen.