Oralda oblystyq Qadyr oqýlary márege jetti
Jınalǵandar Qadyr eskertkishine gúl shoqtaryn qoıyp, taǵzym etkennen atalmysh ortalyq dırektory, aqyn Baýyrjan Halıolla, Syrym aýdanynyń ákimi Abat Shynybekov qatysýshylarǵa sáttilik tilep, Qadyr oqýlarynyń aıasy jylma-jyl keńeıip kele jatqandyǵyn jetkizdi.
Oblystyq bilim basqarmasynyń qoldaýymen Syrym aýdany ákimdigi uıymdastyryp otyrǵan dástúrli sharanyń deńgeıi joǵarylaı túspekshi. Atap aıtqanda, sáýir aıynda aımaqtyq Qadyr oqýlaryn ótkizý kózdelýde, oǵan qazirdiń ózinde Aqtóbe, Atyraý, Mańǵystaý oblystarynyń ókilderi qatysýǵa daıyn ekendikterin bildirdi. Bul baıqaýdy respýblıkalyq deńgeıde uıymdastyrýdyń bastaýy bolmaq.
Oblys aýdandary men Oral qalasynan iriktelip kelgen talapty shákirtter qatysqan Qadyr oqýlary bul joly da dástúrli úsh baǵyt boıynsha ótkizildi. «Sózdiń bári qudiretti» atalymy boıynsha oqýshylar Qadyr óleńderin jatqa mánerlep oqýdan synǵa tústi. Bul atalym boıynsha Oral qalasyndaǵy A.Baıtursynov atyndaǵy №10 orta mektepten kelgen Ibragım Valıev bas júldeni jeńip aldy. «Keıbir jyrym dán ushyryp qyrmanda, Keıbir jyrym baqtashy bop júr mańda» atalymynda aqynnyń sózderine jazylǵan ánder oryndaldy. Munda Shyńǵyrlaý aýdany Shyńǵyrlaý mektebiniń shákirti Nurgúl Baıǵalıeva jeńimpaz atandy. Al «Qýyp shyǵar qyzyl sózdi oı keıin» atalymy boıynsha Qadyr aqynǵa arnap, jyr jazǵan balalar qazylar alqasynan baǵasyn aldy. Bul atalym boıynsha bas júlde berilgen joq, Jańaqala aýdanyndaǵy Jańaqala mektep-gımnazııasynyń oqýshysy Asanáli Nókesh birinshi oryndy ıelendi. Sondaı-aq M.Ótemisov atyndaǵy oblystyq saýyqtyrý mektep-ınternatynan kelgen Erketań Ibatov Syrym aýdany ákiminiń arnaıy júldesin enshiledi. Baıqaý jeńimpazdary men júldegerleri aımaqtyq Qadyr oqýlaryna joldama aldy.
Gala-kontsertte jeńimpaz-júldegerler óner kórsetip, olar baǵaly syılyqtarmen, dıplomdarmen marapattaldy. Sondaı-aq Syrym aýdany ónerpazdary da kontsert qoıyp, mereke mereıin kóterdi.