Oralda nemis halqynyń «Fashıng» ulttyq karnavaly toılandy
Qazaqstan halqy BQO assambleıasynyń «Haımat» nemis etnomádenı birlestigi uıymdastyrǵan shara maqsaty - jurtshylyqty nemis ultynyń salt-dástúri, mádenıetimen tanystyrý, óńirdegi ultaralyq kelisimdi nyǵaıtý.
Merekege oblystaǵy etnomádenı birlestikter ókilderi, Valdorf baǵytyndaǵy mektep-gımnazııanyń kýratory Elke Vınter hanym (Germanııa, Hagen qalasy), qala mektepterinen muǵalimder men oqýshylar keldi.
Karnaval meımandaryn «Qoǵamdyq kelisim» kommýnaldyq mekemesiniń dırektory Aleksandr Ájiǵalıev, «Haımat» etnomádenı birlestiginiń jetekshisi Edýard Frıtsler qarsy alyp, Dostyq úıiniń foıesinde nemistiń ulttyq taǵamdarynan dám tatýǵa shaqyrdy. A.Ájiǵalıev bıyl etnostar kúni aıasynda ár ulttyq-mádenı birlestik óz meıramyn táýelsizdiktiń torqaly toıyna oraı atap ótip jatqanyn aıtyp, nemis karnavalyna sáttilik tiledi. Mereke aıasynda ulttyq shyǵarmashylyq ujymdar óz ónerlerin kórsetti.
Fashıng karnavaly jyl saıyn Germanııa qalalary men aýyldarynda atalyp ótiledi. Karnaval 11-inshi aıdyń 11-inshi kúni saǵat 11-den 11 mınýt ketkende bastalady. Turǵyndar óz úılerin, dúkenderdi, meıramhana, syra barlaryn merekege arnap bezendiredi, kireberiske sabannan jasalǵan karnavaldyq qýyrshaqtardy ilip, meıram bitken soń olardy órteıdi. Eń úlken sherýler Keln, Dıýsseldorf, Maınts sııaqty iri qalalarda ótedi. Ádette karnavaldyń birinshi kúni (beısenbi) árbir qala hanzada men hanshaıymdy tańdaıdy. Al keshke túrli dámdi taǵamdar daıyndap, bir-birine qonaqqa barady, meıramhanalar men barlarda saýyq keshterin uıymdastyrady. Karnaval apta boıy, beısenbiden sársenbige deıin jalǵasady. Árbir kún ózine tán ózgesheligimen erekshelenedi. Fashıng karnavaly adamdardyń kóńil-kúıin kóterip, turǵyndarǵa mereke men shattyq syılaý úshin ótkiziledi.
Aıta keteıik, «Haımat» Oral nemis mádenı-aǵartý qoǵamy» qoǵamdyq birlestigi 1997 jyly qurylǵan. Oblysta 1,5 myńnan astam nemis ultynyń ókilderi turady.