Oralda Naýryz meıramy jańa alańda toılandy

ORAL. QazAqparat - Búgin Ulystyń uly kúni - Naýryz meıramy Oral qalasynda ótken jyly Qazaqstan táýelsizdiginiń 25 jyldyǵyna oraı ashylǵan jańa alańda toılandy, dep habarlaıdy «QazAqparat» HAA tilshisi.

Batys Qazaqstan oblysynyń ákimi Altaı Kólginov jınalǵan jurtshylyqty Naýryz meıramymen quttyqtap, izgi lebizin jetkizdi. Shyǵys kúntizbesi boıynsha jyl basy bolyp esepteletin 22 naýryzda kún men tún teńeledi. Naýryz ejelden jańarý men barsha jaqsylyqtyń bastaýy, yrys-yntymaq pen bereke-birliktiń meıramy bolyp esepteledi. Bul kúni adamdar bir-birimen qushaq jaıyp, amandasyp, «Ulys oń bolsyn, aq mol bolsyn!» dep quttyqtaıdy. Bir-birine qonaqqa baryp, ókpesi bolsa keshiredi. Merekelik dastarhan jaıylyp, aqsaqaldar tórge ozyp, batasyn beredi. Elbasymyz Nursultan Ábishuly Nazarbaevtyń salıqaly saıasaty arqasynda Qazaq elinde barsha ult ókilderi Naýryz meıramyn da osylaısha birge toılaı bermek.

 

Alań ortasynda qurylǵan sahnada elge tanymal ártister óz ónerlerin kórsetti. Teatrlandyrylǵan kórinister qoıylyp, ádemi án, myń buralǵan bı kópshilik nazaryna usynyldy. Qala turǵyndary túrli sporttyq oıyndarǵa qatysyp, altybaqan tepti, atpen, arbamen serýendeýge  múmkindik aldy. Jaǵalaı tigilgen kıiz úıler de jańa alańǵa erekshe sán berdi.

 

Bul kúni sondaı-aq Oralǵa qarasty Zachagan kentinde, oblys aýdandarynda Naýryz merekesi keńinen toılandy.