Oralda Naýryz merekesi qarsańynda 117 páterlik turǵyn úı paıdalanýǵa berildi
Onyń ashylý rásimine qatysqan qala ákimi Abat Shynybekovtiń málim etkenindeı, bul – Zachagan kentinde «Nurly jer» memlekettik baǵdarlamasy aıasynda tapsyrylǵan kezekti kópqabatty turǵyn úı.
«QurylysTaımKontrakt» JShS turǵyzǵan 9 qabatty turǵyn úıdegi páterler «Turǵyn úı qurylys jınaq banki» salymshylary men kezekte turǵandarǵa berildi.
«Zachagan kentinde sońǵy jyldary kópqabatty turǵyn úıler, mektep, balabaqsha, emhana, sport jáne saýda nysandary boı kóterip keledi. Sońǵy jarty jylda Oral-Sarytaý joly boıyndaǵy Birlik kóshesinde segiz kópqabatty úı iske qosyldy. Birneshe úı salyný ústinde. «QPO b.v.» kompanııasy esebinen jańa sport kesheni turǵyzylýda. Jeke ınvestıtsııa esebinen osy mańda «Altyndar» gıpermarketi ashylsa, №52 mektep qurylysy júrgizilýde. Basqa da áleýmettik nysandar salynatyn bolady. Keshe óńirimizde Kórisý merekesi atalyp ótilse, alda Naýryz meıramy da jaqyn. Qýanyshty kúnderimiz kóp bolsyn!», dedi A.Shynybekov.
Jalpy aýdany 6852,81 sharshy metrdi quraıtyn jańa úıdegi baspanalardyń 36-sy bir, 54-i eki, 27-si – úsh bólmeli páterler.
Páter kiltine ıe bolǵandardyń biri Oksana Korshýnova óziniń jetim óskendigin, jeti jyl boıy kezekte turyp, baspanaly bolyp jatqandyǵyn, ájesi jáne bes jasar ulymen birge turatyndyǵyn qýana jetkizdi.