Oralda «Naýryz-dýman» ulttyq óner keshi ótkizildi

ORAL. QazAqparat - 21 naýryz kúni Ulystyń uly kúni - Naýryz merekesine oraı Ǵ.Qurmanǵalıev atyndaǵy oblystyq fılarmonııanyń úlken zalynda «Naýryz-dýman» ulttyq óner keshi ótkizildi, dep habarlaıdy «QazAqparat» HAA tilshisi.

Fılarmonııa uıymdastyrǵan merekelik shara shymyldyǵy «Nazerke» halyqtyq bı ansambliniń bıimen ashylyp, «Oral sazy» folklorlyq-etnografııalyq ansambliniń súıemeldeýimen Kúlásh Qýanyshqalıeva «Toı bazar» halyq ánin shyrqady.
Sodan keıin Ásel Murjanova «Qyz Jibek» operasynan Jibektiń áni «Gákkýdi» áýeletse, «Eren eńbegi úshin» medaliniń ıegeri Dastan Esentemirov Shegeniń arııasyn shalqytty. Hor ujymynyń súıemeldeýimen Ernar Ómiráliniń halyq áni «On alty qyzdy» oryndaýy da erekshe áser qaldyrdy.
Sonymen qatar sopranolar sherýi, halyq ánderinen popýrrı, ulttyq oıyndar kórermender nazaryna usynyldy. Kontsertte sondaı-aq «Mádenıet salasynyń úzdigi» Maıra Haıdarova, «Eren eńbegi úshin» medaliniń ıegerleri Jańylsyn Hasanova, Aıbar Haıyrhanov, respýblıkalyq baıqaýlardyń laýreattary Darııa Baqytova, Aqsulý Jumalıeva, Aqmaral Ahmetova, Aıym Shekeeva, Aıdana Ájiǵalıeva, Danııar Esqalı, Aqbóbek Qaıyrjanova óner kórsetip, kópshilik qoshemetine bólendi.
 Aıta keteıik, 22 naýryz kúni Naýryz meıramyna arnalǵan teatrlandyrylǵan shara bıyl alǵash ret Oral qalasyndaǵy 7-shaǵynaýdandaǵy jańa alańda ótedi. Oǵan qosa shaharda basqa da mádenı-sporttyq sharalar uıymdastyrylýda.