Oralda munaı ónimin zańsyz tasymaldaýshylarǵa jańa sot úkimi shyqty
BQO qylmystyq ister jónindegi mamandandyrylǵan aýdanaralyq sotynda bul is osymen ekinshi ret qaralyp otyr.
Іsti qaraǵan sýdıa Qaırat Óteshevtiń aıtýynsha, Qaırat Namazbaev uıymdastyrǵan qylmystyq top Reseıden Qazaqstanǵa munaı ónimin (bıtým) zańsyz tasymaldaǵan. Reseı men Qazaqstan arasyndaǵy úkimetaralyq kelisimge sáıkes bıtým tasymaldaýǵa tyıym salynǵan. Kelisim áli de kúshinde.
2017 jyldyń 5 qyrkúıeginde «Kóshim» beketinde Reseıden bıtým tasymaldaǵan bes avtokólik ustaldy. Zerthanalyq tekserýler ondaǵy munaı óniminiń bıtým ekendigin kórsetti.
Reseıdiń Orynbordaǵy «Nomad-Invest» zaýytynan (basshysy Tımýr Qalıev) qazaqstandyq «Sundex» (dırektory Qaırat Namazbaev) JShS-ǵa baǵyttalǵan ónimniń ilespe qujattarynda ol bıtým emes, rezeńke bıtýmdy qospa (RBV) retinde kórsetilgen. Keıin kontragentti tekserý kezinde anyqtalǵandaı, Namazbaevtyń fırmalarymen Reseıden jetkizilgen ónim RBV bolyp resimdelgenimen, shyn mánisinde bıtým satylyp otyrǵan.
Sot úkimimen Qaırat Namazbaev QR QK 197-baby 4-bóligi 1 jáne 2-tarmaqshalary (munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý), 244-baby (azamattyń salyq jáne (nemese) bıýdjetke tólenetin basqa da mindetti tólemderdi tóleýden jaltarýy), 245-baby 3-bóligi (uıymdarǵa salynatyn salyqty jáne (nemese) bıýdjetke tólenetin basqa da mindetti tólemderdi tóleýden jaltarý), 262-baby 1-bóligine (uıymdasqan topty nemese qylmystyq uıymdy qurý, sol sııaqty oǵan nemese qylmystyq uıymnyń qurylymdyq bólimshesine basshylyq etý) sáıkes aıypty dep tanyldy. Q.Namazbaevqa múlkin tárkileýsiz 8 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteý úkimi kesildi. Buǵan deıin oǵan merzimin qaýipsizdigi joǵary mekemede óteýmen 10 jylǵa bas bostandyǵynan aıyrý jazasy taǵaıyndalǵan bolatyn.
Sol sekildi Jandos Qaıyrbaev, Tımýr Qalıev, Aıbek Balturmanov jáne Nurlan Kenjenov QR QK 197-baby 4-bóligi 1 jáne 2-tarmaqtary (munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý), 262-baby 2-bóligine (uıymdasqan topqa nemese qylmystyq uıymǵa qatysý) sáıkes aıypty dep tanyldy. Olarǵa múlikterin tárkileýsiz 6 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteý belgilendi. Atalmysh tulǵalar osyǵan deıingi úkimde segiz jylǵa kesilgen bolatyn.
Al QR QK 216-baby 1-bóligine (is júzinde jumystar oryndalmaı, qyzmetter kórsetilmeı, taýarlar tıep-jóneltilmeı shot-faktýra jazý boıynsha áreketter jasaý) sáıkes aıypty dep tanylǵan Baqytjan Jaqataevqa probatsııalyq baqylaý ornatylyp, 1 jyl 6 aıǵa bas bostandyǵy shekteldi. B.Jaqataev merzimin qaýipsizdigi ortasha qylmystyq-atqarý júıesi mekemesinde óteýmen 5 jylǵa sottalǵan edi.
Sot úkimdi shyǵarǵan kezde sottalýshylardyń buryn isti bolmaǵanyn, jastyǵyn, otbasyly ekendikterin eskerdi.
Q.Óteshevtiń sózine qaraǵanda, bastapqy úkimnen ózgesheligi, bul joly qylmystyq toptyń transulttyq sıpaty alynyp tastaldy.
Q.Namazbaev bastaǵan sottalýshylardan memleket paıdasyna 539 mln teńge óndirildi.
Sonymen qatar kýágerler Kýcherov, Zaıtseva jáne Qartqojaqovanyń bergen jaýaptarynyń durystyǵyna kúmán týýyna baılanysty buǵan baǵa berý jóninde jeke uıǵarym shyǵaryldy.
Sot úkimi kúshine engen joq.
Eske sala keteıik, budan buryn Oralda munaı ónimderin zańsyz tasymaldaýshylarǵa qatysty sot úkimi shyqqanyn jazǵan bolatynbyz.
Keıin is apellıatsııalyq sot alqasynda qaralyp, birinshi satydaǵy sot úkimi buzylyp, qaıta qaraýǵa jiberilgen edi.