Oralda «Mereıli otbasy - 2017» baıqaýynyń jeńimpazy belgili boldy
Elbasy N.Á.Nazarbaevtyń bastamasymen ulttyq salt-dástúrdi jáne otbasylyq qundylyqtardy nasıhattaý maqsatynda osymen tórtinshi ret uıymdastyrylǵan saıystyń Oral qalasy men aýdandardaǵy irikteý kezeńderine barlyǵy 129 otbasy qatysyp, solardyń ishinen 26-sy oblystyq baıqaýǵa joldama alǵan bolatyn.
Óńirlik kezeń qorytyndysynda Jánibek aýdanynan kelgen Chýkınder otbasy bas júldeni jeńip aldy. Áýelden óner qonǵan shańyraqta otaǵasy, marqum Ǵadil Chýkın mamandyǵy mal dárigeri bolǵanymen, keıin Uzynkól orta mektebinde mýzyka páninen dáris berdi. Al otanasy Jańylsyn Esenqyzy osy bilim ordasynda orys tili men ádebıeti pániniń muǵalimi retinde otyz jyldan astam ýaqyt boıy ustazdyq etip keledi ári mektep dırektorynyń tárbıe isi jónindegi orynbasary. Eki ul, úsh qyzdy qanattandyrǵan erli-zaıypty Chýkınder 1993 jyly otbasylyq ansambl quryp, óz ónerlerimen aýyl-aımaqqa tanymal boldy. Túrli baıqaýlarǵa qatysyp, júldeli oryndardy da ıelendi. Qaıyrymdylyq isterden de shet qalmaıtyn Chýkınder endi Astana qalasynda ótetin «Mereıli otbasy - 2017» ulttyq baıqaýyna ázirlenetin bolady.
Oblystyq kezeń qorytyndysynda sondaı-aq Tasqala aýdanynan kelgen Qoıshybaevtar birinshi, zelenovtyq Halelovtar ekinshi, terektilik Qýanyshqalıevter úshinshi orynǵa ıe boldy. Basqa otbasylar da túrli atalymdarmen marapattaldy.
«Memleket basshysynyń salıqaly saıasaty arqasynda elimiz órkendep, qaryshty damý ústinde. Buǵan birligi bekem, mereıi ústem otbasylar da óz úlesterin qosyp keledi. Dúnıege sábı keltirip, deni saý, rýhy myqty, bilimi tereń urpaq tárbıeleıtin otbasy kóbeıe tússe, memleketimizdiń irgesi myqty bolyp, ortaq shańyraǵymyz shattyq pen baqytqa, yrys-yntymaqqa tola bermek», dedi jeńimpaz-júldegerlerdi quttyqtaǵan oblys ákiminiń birinshi orynbasary Arman Óteǵulov.