Oralda mektepke bomba qoıyldy: habar jalǵan bolyp shyqty
BQO polıtsııa departamentiniń baspasóz qyzmetinen málim etkenindeı, oqıǵa búgin boldy.
«Habar túsken boıda oqıǵa ornyna barlyq arnaıy jáne jedel qyzmetter jiberildi. Bastapqy áreket etý kúshterimen mektep tekserildi. Habar jalǵan bolyp shyqty. Qazirgi kezde habar taratqan adamdardy anyqtaý boıynsha jedel izdestirý is-sharalary júrgizilýde. BQO polıtsııa departamenti terrorızm aktisi týraly kórineý jalǵan habarlaǵan adamnyń bes myń aılyq eseptik kórsetkish mólsherinde aıyppul salýǵa ne sol mólsherde túzeý jumystaryna ne bes jylǵa deıingi merzimde bas bostandyǵyn shekteýge ne sol merzimge bas bostandyǵynan aıyrýǵa jazalanatynyn eske salady», — dep habarlady vedomstvodan.
Oral qalasy bilim berý bólimi atalǵan mektepte sabaq jalǵasyp jatqanyn jetkizdi.
Eske sala keteıik, budan buryn BQO-da sońǵy 5 jylda otbasylyq-turmystyq qylmystardyń úsh esege óskenin jazǵan bolatynbyz.