Oralda Mánshúk Mámetova atyndaǵy halyqaralyq áýejaı ǵımaraty paıdalanýǵa berildi
Ǵımarattyń ashylý rásimine qatysqan oblys ákimi Ǵalı Esqalıevtiń atap ótkenindeı, bıylǵy naýryzda Úkimet qaýlysyna sáıkes áýejaıǵa Keńes Odaǵynyń Batyry Mánshúk Mámetovanyń 100 jyldyǵyna oraı qazaqtyń batyr qyzynyń esimi resmı túrde berildi.
«Ǵımarat zamanaýı tehnologııalardy qoldana otyryp, halyqaralyq standarttarǵa sáıkes salynǵan. Qazaqstannyń batys qaqpasy sanalatyn Oral qalasynyń áýejaı termınaly óńirdegi týrızmniń damýyna, jolaýshylar aǵynyn ulǵaıtýǵa, jańa halyqaralyq baǵyttardy ashýǵa, áýe kólikteri arqyly júk aınalymyn arttyrýǵa serpin bermek. Áýejaı qurylysyna qarjy bólgen «QPO b.v.» kompanııasynyń bas dırektory Djankarlo Rýıý ózi de qurylysshy bolǵandyqtan, nysanǵa kelip, aqyl-keńesin berip turdy. Qurylysqa qazaqstandyq kompanııalardyń belsene qatysqanyn atap aıtý kerek. Osy oraıda bas merdiger, «KazConstructionGroup» JShS (bas dırektory Muratbek Muhambedıev) ujymyna, abattandyrý jáne kógaldandyrý jumystaryna qoldaý kórsetken jeke kásipker Qaırat Kárimovke alǵysymdy bildirgim keledi», - dedi óńir basshysy.
QR Indýstrııa jáne ınfraqurylymdyq damý vıtse-mınıstri Berik Kamalıev aldaǵy ýaqytta áýejaı sheteldik áýe kompanııalary ushaqtarynyń ushýy úshin «Ashyq aspan» rejımine qosylatynyn, bul sheteldik týrıster aǵynyn arttyrýǵa septigin tıgizetinin jetkizdi.
Joba quny 6,6 mlrd teńge turatyn halyqaralyq áýejaı termınalynyń aýmaǵy 4 500 sharshy metrden 10 myń sharshy metrge deıin ulǵaıtylǵan.
Nysanda jolaýshylardyń júkteri men ózin-ózi tirkeýge arnalǵan qurylǵy ornatyldy. Bul saǵatyna 80-nen 400-ge deıin jolaýshyǵa qyzmet kórsetýge múmkindik bermek.
Áýejaı arqyly jylyna 600 myńǵa deıin jolaýshy óte alatyn bolady. Sondaı-aq Amsterdam, Máskeý, Kıev, Ystanbul, Sankt-Peterbýrg, Ábý-Dabı, Atyraý, Shymkent baǵyttarynda jańadan reıster ashý kózdelgen.
Jańa zamanaýı júıe engizilgen áýejaıdyń aýmaǵy tolyǵymen abattandyrylyp, jolaýshylardyń demalysy men tynyǵýy úshin saıabaq ta salynǵan.
Avtoturaq oryndarynyń sany 30-dan 120-ǵa jetken.
Sonymen qatar jolaýshylardyń kútý zalynda ana men bala, múgedekterge arnalǵan arnaıy bólmeler jasaqtalǵan. Áýejaı qurylysyna paıdalanylǵan qajetti materıaldardyń 60 paıyzy – qazaqstandyq ónim.
Áýejaı ázirge tájirıbelik paıdalaný rejıminde jumys isteıtin bolady. Tájirıbelik paıdalaný kezeńinde barlyq jańa jabdyqtar bir ýaqytta synalmaq.
Eske sala keteıik, budan buryn Oral áýejaıyna Mánshúk Mámetovanyń esimi berilgenin jazǵan bolatynbyz.