Oralda «Mańǵystaý» zymyran-artıllerııalyq kemesi sýǵa túsirildi
Saltanatty rásimde Batys Qazaqstan oblysynyń ákimi Altaı Kólginovtiń atap ótkenindeı, Qazaqstandaǵy kater shyǵaratyn birden-bir kásiporyn - «Zenıt» zaýyty elimiz táýelsizdik alǵan 25 jyl ishinde buǵan deıin 25 keme jasap shyǵarǵan bolatyn. Ol kemeler qazirgi tańda Kaspıı teńizinde el tynyshtyǵyn kúzetýde. Búgingi sý jańa «Mańǵystaý» kemesi qazirgi zamanǵy talaptarǵa saı keledi. Bul qaı salada bolsyn, Qazaqstandy jańǵyrtý jónindegi Elbasy tapsyrmalarynyń oryndalyp otyrǵandyǵyn kórsetedi.
QR Qorǵanys jáne aeroǵarysh ónerkásibi mınıstri Beıbit Atamqulovtyń aıtýynsha, búgingi keme túsirý saltanaty - Elbasy Jarlyǵymen ótken jylǵy qazanda qurylǵan jańa mınıstrliktiń alǵashqy úlken merekesi.
«Elbasymyz ekonomıkany jańǵyrtý baǵytynda aldymyzǵa úlken maqsat-mindetter qoıyp otyr. Qazirgi tańda sý yǵystyrylymy 600 tonnaǵa deıin jetetin kemeler qurastyratyndaı múmkindik bar. Osylaısha Qazaqstan óz kemelerin jasap otyrǵan qýatty elge aınalyp keledi. Sol úshin «Zenıt» zaýytynyń ujymyna, ınjenerleri men konstrýktorlaryna alǵys aıtqym keledi. Aldaǵy ýaqytta bul zaýyt Shaǵan ózenine syımaıtyn alyp kemelerdi jasaı alady. Sondyqtan «Zenıt» zaýytynyń múmkindikterin Kaspıı jaǵasyna jetetindeı etip keńeıtý kerek. ıAǵnı bolashaqta zaýyt mamandary Kaspıı teńizi jaǵasynda alyp kemelerdi jasap, ony damytý baǵytynda qyzmet atqara alady», dedi mınıstr Beıbit Atamqulov.
Aıta keteıik, «Zenıt» zaýytynda qurastyrylǵan «Mańǵystaý» kemesi QR Qarýly kúshteri Áskerı-teńiz kúshteriniń qajeti úshin arnaıy tapsyryspen daıyndaldy. Bul Áskerı-teńiz kúshterine beriletin osyndaı turpattaǵy tórtinshi keme bolyp tabylady. Burynǵylaryna qaraǵanda, bul kemede QR Qorǵanys jáne aeroǵarysh ónerkásibi mınıstrliginiń tapsyrmasyna sáıkes qarý-jaraq jańartylyp, atqarylatyn mindet aýqymy keńeıtilgen. Mysaly, onda qarýly júzgishterdi qosqanda, sýasty qaýipterdi anyqtaıtyn qural-jabdyq ornatylǵan. Qurastyrý kezinde osyndaı kemelerdi paıdalanatyn áskerı bólimderdiń usynys-tilekteri de eskerilgen.