Oralda latyn álipbıine kóshý joldary talqylandy
BQO tilderdi damytý basqarmasy, «Eýrazııa áleýmettik-gýmanıtarlyq zertteý ortalyǵy» qoǵamdyq birlestigi uıymdastyrǵan sharaǵa tilshi mamandar, ǵalymdar, memlekettik qyzmetshiler, zańgerler, orta jáne jalpy, joǵary bilim berý uıymdarynyń ustazdary qatysty.
Semınarda fılologııa ǵylymdarynyń kandıdaty, Abaı atyndaǵy Qazaq Ulttyq pedagogıkalyq ýnıversıtetiniń dotsenti, A.Baıtursynov atyndaǵy Til bilimi ınstıtýtynyń aǵa ǵylymı qyzmetkeri Názıra Ámirjanova «Rýhanı jańǵyrý jáne álipbı tańdaý máseleleri», Batys Qazaqstan ınnovatsııalyq-tehnologııalyq ýnıversıtetiniń professory, fılologııa ǵylymdarynyń doktory Murat Sabyr «Tildik ustanym jáne latyn qarpi», M.Ótemisov atyndaǵy Batys Qazaqstan memlekettik ýnıversıtetiniń dotsenti, PhD doktor Qamar Aldasheva «Qazaqstan Respýblıkasyndaǵy til saıasaty: latyn álipbıine kóshýdegi norma jáne kodıfıkatsııa máseleleri», Batys Qazaqstan oblystyq memlekettik qyzmetshilerdiń biliktiligin arttyrý jáne qaıta daıarlaý ortalyǵynyń dırektory mindetin atqarýshy, tilshi-ǵalym Bolat Jeksenǵalıev «Latyn jazýy negizinde ulttyq álipbı qalyptastyrý máseleleri», Nazarbaev zııatkerlik mektebiniń muǵalimi, fılologııa magıstri Álıma Dúıismaǵanbetova «Latyn álipbıine kóshý máselesi týraly qoǵamdyq oı-pikirler (áleýmettik zertteýdiń mańyzy)» degen taqyryptarda baıandama jasady.
Jıynda Elbasy N.Á.Nazarbaevtyń «Bolashaqqa baǵdar: rýhanı jańǵyrý» maqalasyna sáıkes tildik tańbany aýystyrýdaǵy ǵylymı máseleler, grafıkanyń standartyn bekitýde eskeriletin jaıttar jan-jaqty taldandy. Sonyń ishinde latyn álipbıiniń sońǵy usynylǵan úlgisi sarapqa salyndy. Atalǵan máselelerge qatysty qalyń buqaraǵa úgit-nasıhat jáne túsinik jumystarynyń saýatty túrde júrgizý qajettigi erekshe aıtyldy. Sebebi bul eldik deńgeıde rýhanı jańǵyrý máselesindegi mańyzdy qadamdardyń biri bolyp otyr.