Oralda «Kúı qudireti» respýblıkalyq baıqaýynyń jeńimpazdary marapattaldy

ORAL. QazAqparat - Oralda QR Táýelsizdiginiń 30 jyldyǵy jáne Ulttyq dombyra kúnine oraı kúıshi-kompozıtor Seıtek Orazalyulynyń 160 jyldyǵyna arnalǵan «Kúı qudireti» respýblıkalyq dombyrashylar baıqaýy márege jetti, dep habarlaıdy QazAqparat tilshisi.

BQO mádenıet basqarmasynyń qoldaýymen oblystyq halyq shyǵarmashylyǵy ortalyǵy uıymdastyrǵan óner dodasyna Nur-Sultan, Almaty, Taldyqorǵan, Taraz, Túrkistan, Qyzylorda, Atyraý, Batys Qazaqstan oblystary men Oral qalasynan 18-45 jas aralyǵyndaǵy 17 dombyrashy qatysty.

Eki kúnge ulasqan saıysqa QR eńbek sińirgen mádenıet qyzmetkeri, «Qurmet» ordeniniń ıegeri, Ǵ.Qurmanǵalıev atyndaǵy oblystyq fılarmonııanyń ártisi, belgili dombyrashy Ermek Qazıev bastaǵan elge tanymal mádenıet jáne óner tarlandary qazylyq etti.

Baıqaýdyń saltanatty jabylý rásimine qatysqan oblys ákiminiń orynbasary Baqytjan Narymbetov Elorda kúni qarsańynda Táýelsizdigimizdiń 30 jyldyǵymen, kúı atasy Qurmanǵazy men kúı anasy Dına meken etken Bókeı handyǵynyń 220 jyldyǵymen tuspa-tus kelgen Seıtek babamyzǵa arnalǵan is-sharanyń Aq Jaıyq óńirin rýhanı serpiltkenin atap ótti.

«Jyldyń sońyna deıin kúı merekesi Dına Nurpeıisovanyń 160 jyldyq mereıtoıy aıasyndaǵy is-sharalarmen jalǵaspaq. Endeshe, egemen elimizdiń taǵy bir mereıli merekesi - Ulttyq dombyra kúni jasaı bersin!», dedi Baqytjan Haberuly.

Baıqaý qorytyndysynda bas júldeni (500 myń teńge) batysqazaqstandyq Azamat Qalıev jeńip aldy.

Sondaı-aq atyraýlyq Qaırat Jumaǵalıev birinshi, Almaty qalasynan kelgen Aıgerim Netalıeva men taldyqorǵandyq Bota Dúngenbaeva ekinshi, qyzylordalyq Baýyrjan Seıdáli, oraldyq Álibek Qýanyshalıev, taǵy bir almatylyq Temirhan Beıbit úshinshi orynǵa ıe boldy.