Oralda kúrdeli jóndelip jatqan mektepterdiń oqýshylary qalaı oqyp júr
BQO bilim basqarmasynan alynǵan málimetke qaraǵanda, bul maqsatqa «QPO b. v.» kompanııasynyń áleýmettik-ınfraqurylymdyq jobalary aıasynda qarajat bólindi.
Qazirgi kezde ǵımaraty kúrdeli jóndelip jatqan daryndy balalarǵa arnalǵan S. Seıfýllın atyndaǵy № 11 oblystyq mamandandyrylǵan mektep-lıtseı-ınternatynyń irgesi qalanǵanyna bıyl týra bir ǵasyr tolady.
Memleket jáne qoǵam qaıratkeri, kórnekti aqyn Sáken Seıfýllınniń 1923 jyly óńirge jasaǵan jumys sapary kezinde qozǵaý salýymen ashylǵan atalmysh qara shańyraq uzaq ýaqyt boıy Oral qalasynda qazaq tilinde sabaq beretin jalǵyz mektep boldy.
Keńes dáýirinde onyń qataryna qosylǵan M.Ótemisov atyndaǵy oblystyq saýyqtyrý mektebi 2021 jyly taratylyp, ǵımaraty № 20 mektepke berildi. Mine, Zachagan kentindegi Jáńgir han kóshesi, 54 mekenjaıda ornalasqan osy ǵımaratqa № 11 mektep ýaqytsha kóship keldi.
Jýyrda osy mektepke dırektor bolyp taǵaıyndalǵan «Bilim berýdegi ózgeristiń 1000 kóshbasshysy» atty respýblıkalyq baǵdarlamasy túlekteriniń biri Shynar Zulqashevanyń málim etkenindeı, atalmysh ǵımaratta jańa oqý jyly 530 oqýshy, 23 synyp jıyntyǵymen bastaldy.
«Kúni búgin oqý úrdisin júrgizý úshin mektep ǵımaratyndaǵy 22 oqý kabıneti jasaqtaldy. Balalardy oqytýǵa qajetti jabdyqtar men tehnıkalar qoıyldy, ınternet jelisine qosyldy, oqýshylar oqýlyqpen túgel qamtyldy. Internat ǵımaratynyń 5-qabatynan Óner mektebi men kishi toptardy oqytýǵa arnalǵan kabınetterde sabaqtar júrgizilýde», deıdi Sh. Zulqasheva.
Mekteptiń bir ereksheligi, onda ınternat balalarynyń jatatyndyǵy. Bul másele ata-ana alańdaýshylyǵyn týǵyzatyny anyq.
Shynar Múlkáıqyzynyń aıtýynsha, ınternat balalaryn qabyldaýǵa ınternat ǵımaratynyń 3-4 qabatynan 208 oryn daıyndaldy. Qazirgi ýaqytta 156 oqýshy ınternatqa ornalasty, tárbıelenýshiler bes mezgil tamaqpen qamtamasyz etildi. Sonymen qatar áleýmettik sanattaǵy 21 balaǵa 1 mezgil ystyq tamaq uıymdastyryldy.
«1 qyrkúıek kúni oqýshylar, ata-analar jáne mektep ustazdarynyń qatysýymen „Mektebim — meıirim mekeni“ taqyrybynda Bilim kúnine arnalǵan saltanatty jıyn ótse, dúısenbide barlyq synyptarda osy taqyrypta tárbıe saǵattary ótkizildi. Búgingi tańda oqýshylarǵa bilim beretin pedagog kadrlar jetkilikti. Oqytý protsesi júıeli júrgizilýde. Al mekteptiń negizgi ǵımaratyn „Jaıkselstroı“ JShS kúrdeli jóndeýden ótkizýde. Elge tanymal mektebimizdiń ǵasyrlyq mereıtoıyna oraı kóptegen is-sharalar josparlanǵan. Sondyqtan kúrdeli jóndeý jumystary tezirek bitkenin qalaımyz», dedi Sh. Zulqasheva.
Oraldaǵy № 17 orta mektep dırektory Marat Zaınýllıevtiń aıtýynsha, 1967 jyly ashylǵannan beri ǵımarat jóndeý kórmegen.
«Kúrdeli jóndeý jumystary shilde aıynda bastaldy. Nysannyń merdigeri — „Naýryz“ JShS jeltoqsan aıynda bitirýdi kózdep otyr. Ǵımarattyń jóndeýge jabylýyna baılanysty 856 oqýshy kórshiles ornalasqan № 19 orta mektepte ýaqytsha bilim alady. Sonymen qatar 701 shákirt № 21 jáne 147 oqýshy № 45 mektepke ornalastyryldy», dedi Marat Haleluly.
Kúrdeli jóndeý júrgizilip jatqan taǵy bir bilim nysany — № 9 orta mektep dırektory Maıra Esenǵazıeva shákirtterdiń oqý protsesimen tolyqtaı qamtylǵanyn jetkizdi.
«Qazirgi tańda № 5 mektepte — 1 326, № 16 mektepte — 568, barlyǵy 1 894 oqýshy bilim alýda. Atap aıtqanda, 1-7 synyp besinshi, joǵary synyptar on altynshy mektepte oqıdy», deıdi Maıra Sansyzbaıqyzy.
Bilim basqarmasynyń málimeti boıynsha 1 260 oryndyq bul mektepti «IGB Group» JSSh jóndeýden ótkizýde.
D.Nurpeıisova atyndaǵy balalar mýzyka mektebinde (620 oryn) dáris alatyndar úshin de oqý úrdisi uıymdastyrylǵan. Bul nysannyń merdigeri — «Beta-Services» JSSh.
Toqsan jyldyq tarıhy bar D. Nurpeıisova atyndaǵy mýzyka mektebiniń dırektory Muhambetqalı Dalbaev qazirgi tańda Q.Amanjolov kóshesi 53-mekenjaıynda ornalasqan burynǵy oblystyq halyq shyǵarmashylyǵy ortalyǵy ǵımaratynda syıysyp jatqanyn jetkizdi.
«Bıyl toqsan jyldyq mereıtoıǵa baılanysty „Atameken“ óner ordasynda kontsert qoıdyq. Oblystyq jáne qalalyq deńgeıde basqa da is-sharalar ótkizilip jatyr. Mektep ǵımaratyn jańa jylǵa deıin paıdalanýǵa berse, sol biz úshin úlken syı bolaıyn dep tur», deıdi Muhambetqalı Saǵıtuly.
Mine, oblys ortalyǵynda kúrdeli jóndelip jatqan mektepterde sabaq osylaısha uıymdastyrylýda. Oqýshylar men ustazdardyń ýaqytsha qıyndyqtan tezirek qutylyp, jańarǵan ǵımaratqa qaıta oralýy úshin bul nysandardyń merziminde jóndelgeni mańyzdy.
Eske sala keteıik, budan buryn BQO mektepterinde jylytý maýsymyna daıyndyq qalaı júrip jatqanyn jazǵan bolatynbyz.
Sondaı-aq BQO-da shalǵaı aýyl balalary oqý jylyn jańa mektepte bastady.