Oralda Kúlki kúni polıtseılermen ázildemek bolǵan áıel sottalýy múmkin

ASTANA. QazAqparat -Oral qalasynda 1 sáýir - Kúlki kúnine oraı polıtseılermen ázildemek bolǵan áıel alty jylǵa deıin bas bostandyǵynan aıyrylýy múmkin, dep habarlaıdy QazAqparat tilshisi.

Búgin saǵat 09.01 shamasynda 1987 jylǵy azamatsha "102" nómirine qońyraý shalǵan.

BQO jedel shtabynan túsken málimetke qaraǵanda, ol óz kúıeýiniń poıyzda  kepil retinde ustalyp otyrǵanyn habarlaǵan. Al biraz ýaqyttan keıin munyń bári qaljyń ekendigin aıtqan. Quqyq qorǵaý organdary A. esimdi azamatshamen qaljyńdasýdy jón kórmeı, onyń ústinen QR QK 273-babyna sáıkes (lańkestik aktisi jóninde kórineý  jalǵan habarlaý) qylmystyq is qozǵady. Bul bap boıynsha alty jylǵa deıin bas bostandyǵynan aıyrý jazasy qarastyrylǵan.

Atalǵan derek boıynsha tergeý amaldary bastaldy.