Oralda qonaqúıde er adamdy óltirgen qyz 10 jylǵa sottaldy

ORAL. QazAqparat – BQO qylmystyq ister jónindegi mamandandyrylǵan aýdanaralyq sotynda Baqtygúl Iratqyzyna qatysty úkim shyqty, dep habarlaıdy QazAqparat tilshisi.

Atalmysh sottyń baspasóz qyzmetinen málim etkenindeı, B.Iratqyzy QR QK 99-baby 1-bóligine (kisi óltirý) sáıkes aıypty dep tanylyp, 10 jyl merzimge bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.

Sýdıa Shara Zaınýllına qaraǵan sot barysynda anyqtalǵanyndaı, qonaqúı bólmesinde alkogoldik ishimdik ishý barysynda N.Imanbaev sottalýshyǵa usynys jasap, jynystyq qatynasqa túsýge ıtermelegen. Buǵan qatty ashýlanǵan B.Iratqyzy jaryq shamnyń symyn alyp, edende otyrǵan jábirlenýshiniń moınynan eki ret orap, qylǵyndyryp óltirgen.

Sotta B.Iratqyzy kinásin ishinára moıyndap, óltirý oıy bolmaǵanyn, «oqıǵa abaısyzda boldy» dep bolǵan iske shyn nıetpen ókinetinin aıtyp, sottan jeńil jaza taǵaıyndaýdy surady.

Sottalýshynyń jábirlenýshini qasaqana óltirýdegi kinási onyń sotqa deıingi jáne sotta bergen jaýaptarymen, oqıǵa bolǵan jerdi tekserý jáne naqtylaý, sot-medıtsınalyq saraptama qorytyndylarymen, kýálardyń, sarapshylardyń jáne basqa da is materıaldarymen dáleldengen.

B.Iratqyzynyń qylmysy asa aýyr qylmystar sanatyna jatady.

Úkim zańdy kúshine engen joq.

Eske sala keteıik, budan buryn Oraldaǵy qonaqúıden er adamnyń máıiti tabylǵanyn jazǵan bolatynbyz.