Oralda kollektordaǵy apatty joıý jumystary jalǵasýda

ORAL. QazAqparat  - Oralda kollektordaǵy apatqa baılanysty jóndeý jumystary jalǵasýda, dep habarlaıdy QazAqparat tilshisi.

«Batys sý arnasy» JShS dırektorynyń birinshi orynbasary Salaýat Aıbatovtyń aıtýynsha, qazirgi kezde qalanyń 4, 5, 6, 7, 9, «Qurylysshy», «Soltústik-Shyǵys» shaǵynaýdandarynda sý joq.

Sol aýdandarda turatyn turǵyndarǵa kúndizgi saǵat 12.00-15.00 jáne 18.00-21.00 aralyǵynda eki mezgil sý jetkizilip berilýde.

«Kollektordaǵy apat kólemi óte aýmaqty bolyp shyqty. Qubyrdy tabý úshin 7,5 metr tereńdikke deıin qazýǵa týra keldi, bul úsh qabatty úıdiń bıiktigimen teń. Budan on jyl buryn áınekplastıkten salynyp, 2009 jyly qabyldanǵan qubyr úgitilip, shirip ketken. Sonyń zardabyn biz tartýdamyz. Bir qudyqtan ekinshisine deıingi 60 metrdeı aralyqty qazýǵa týra keledi. Onyń ústine káriz sýy qaıta-qaıta jınalýda. Brıgadalar úzilissiz jumys jasaýda. Tek keshe túnde jańbyr jaýyp ketken soń, ýaqytsha toqtatylyp, búgin tańerteń qaıta kiristi. Bárin qazyp bitirgennen keıin jańadan qubyr salamyz. Qalpyna keltirý jumystarynyń qashan bitetinin ázirge aıta almaımyz», - dedi QazAqparat tilshisine S.Aıbatov.

Eske sala keteıik, 30 sáýir kúni Oralda káriz kollektoryndaǵy apat saldarynan qalanyń edáýir bóligi sýsyz qalǵanyn jazǵan bolatynbyz.

Foto: rabochy-put.ru