Oralda kólikti mas kúıde aıdaǵan 160-tan astam júrgizýshi sottaldy

<p>ORAL. KAZINFORM &ndash; Oral qalasynda ótken jyly mas kúıde ustalǵan 163 júrgizýshi sottaldy.</p>

BQO prokýratýrasynyń baspasóz qyzmetinen túsken málimetke qaraǵanda, bul júrgizýshiler kólik quralyn basqarý quqyǵynan aıyrý týraly sot sheshimine qaramastan, masań kúıde qaıtadan rýlge otyrǵan.

Mysaly, Z. degen azamat masań kúıinde kólik júrgizgeni úshin sottalǵan. Sottylyq merzimi ótpese de, ol mas kúıde kólikti qaıta tizgindegen. 

Úkimge memlekettik aıyptaýshynyń tabandy ustanymy jáne sottalýshynyń kinási týraly sotqa usynǵan bultartpas dálelderi yqpal etti.

Sot júrgizýshini kináli dep taýyp, 4 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýdi belgiledi. Sonymen qatar ol kólikti basqarý quqyǵynan ómir boıyna aıyryldy.

Qazaqstan Respýblıkasynyń zańnamasynda mas kúıinde kólik júrgizgeni úshin ákimshilik jazamen qatar qylmystyq jaýapkershilik te qarastyrylǵan. QR QK 346-babyna sáıkes aıypty dep tanylǵan adamǵa kólik quralyn basqarý quqyǵynan ómir boıyna aıyrýmen birge 10 jylǵa deıin bas bostandyǵynan aıyrý jazasy kesiledi. 

- Osy oraıda qaıtalanatyn qylmystarǵa jol bermeý maqsatynda Oral prokýratýrasynyń bastamasymen buryn kólik júrgizý quqyǵynan aıyrylǵan sottalǵandardyń qatysýymen ashyq sot otyrysy da ótkizildi. Oqıǵalardy taldaý júrgizýshilerdiń zańsyz áreketteri qasaqana jasalǵanyn kórsetti. Aldyn alý sharalary men eskertýlerge qaramastan, mundaı jaǵdaılar tolastamaı tur, - dep habarlady vedomstvodan. 

Eske sala keteıik, budan buryn Oral qalasynda 40 alkomarkettiń 15-i lıtsenzııasynan aıyrylǵanyn jazǵan bolatynbyz.