Oralda kóktaıǵaqta muzǵa taıyp jyǵylǵan 156 adam dárigerge júgindi

<p>ORAL. KAZINFORM — Oral qalasynda kóktaıǵaq saldarynan muzǵa taıyp jyǵylyp, zardap shekken adamdar kóbeıdi.</p>

 
BQO densaýlyq saqtaý basqarmasy baspasóz qyzmeti málim etkendeı, 12 aqpan kúngi saǵat 08.00-den búgin sol ýaqytqa deıin muzǵa taıyp qulaǵan 137 adam jaraqat pýnktine júgindi.

«Oblystyq kópbeıindi balalar aýrýhanasynda 58 bala járdemdi qajet etken. Sonyń ekeýi synyq jaraqatymen aýrýhanaǵa jatqyzylsa, 56-synyń denesi kógergen. Oblystyq kópbeıindi aýrýhanaǵa 34 adam jetkizilip, 18-iniń denesi kógergen. 15-i synyq jaraqatyn alǵan. Úsh adam aýrýhanaǵa ornalastyrylyp, 31-ine ambýlatorııalyq em taǵaıyndaldy. Qalalyq kópbeıindi aýrýhanada 45 adamnyń jeteýi (synyq) statsıonarǵa jatqyzyldy. 38-i ambýlatorııalyq em alady» dep habarlady vedomstvodan.

Sonymen qatar búgin saǵat 08.00-den 10.00-ge deıin 7 adam qalalyq, 11 adam oblystyq aýrýhanaǵa tústi.

Sonymen qatar 1 bala oblystyq balalar aýrýhanasyna jetkizildi.

Oral qalasy bilim bólimi kóktaıǵaqqa baılanysty búgin tústen keıin de sabaqtyń onlaın bolatynyn habarlady.

BQO TJ departamentiniń málimetine qaraǵanda, tek Oral qalasy ǵana emes, oblys boıynsha da kóktaıǵaq bolyp tur.

Qazirgi sátte óńirde jabylǵan joldar sany 21-ge jetse, sonyń 10-y — respýblıkalyq, 11-i — oblystyq joldar. 

Eske sala keteıik, budan buryn Batys Qazaqstanda aýa raıynyń nasharlaýyna baılanysty 7 jol ýchaskesi jabylǵanyn jazǵan bolatynbyz.

Sondaı-aq Oralda kóktaıǵaqqa baılanysty qoǵamdyq kólikter toqtatyldy.