Oralda qoǵamdyq kólikterdiń jolaqysy ózgeredi
Oral qalalyq máslıhatynyń sessııasynda bul másele qaralyp, tıisti sheshim qabyldandy.
Qalalyq máslıhattyń baspasóz qyzmetinen málim etkenindeı, depýtattar basym daýyspen qoǵamdyq kólikterde jolaqyny qolma-qol aqshasyz tóleý baǵasyn 100 teńgege deıin (qazirgi kezde 80 teńge) kóterýge kelisti. Al qolma-qol aqshamen jolaýshylar 200 teńge (buǵan deıin 150 teńge) tóleıtin bolady.
Jańa tarıfti Oral qalasy ákimdiginiń qaýlysymen aldaǵy qańtar aıynan bastap engizý kózdelýde.
Oblys ortalyǵynda 26 baǵyt boıynsha alty jolaýshy tasymaldaý kásiporny qyzmet kórsetedi.
Jyl saıyn osy qyzmetti 54,5 mln adam (qala turǵyndary men qonaqtary) paıdalanady.
Qala ákimdiginiń málimetine qaraǵanda, jolaýshy tasymaldaýshylardyń qarjylyq esebi qazirgi tarıf kezinde shyǵynnyń kiristen anaǵurlym asyp túsetindigin kórsetedi, sondyqtan zııanǵa qalady. Soǵan baılanysty sýbsıdııalaý tetigi qoldanylyp keledi. Qala ákimdigi 2021 jyldan bastap jolaqy tóleýdiń elektrondy júıesin engizý nátıjesinde aqsha aınalymy ashyq bolyp, jolaýshylardyń esebi dál júrgiziledi. Tasymldaýshylardyń kiris bóligi 3, bıýdjetke salyqtyq túsim 5, jumys orny 4 esege ósti. Elektrondy tólemder úlesi 40-tan 97 paıyzǵa jetti.
Avtobýs parkin jańartý jaqsaryp keledi, 2022 jyly 79, bıyl 37 jańa avtobýs satyp alyndy.
Sýbsıdııa kólemi 2017 jylǵy 34 mln teńgeden bıyl 5,3 mlrd teńgege jetti. Degenmen bul tasymaldaýshylar shyǵynyn jappaıdy. Mysaly, olar ótken jyly 5,9 mlrd teńge jumsasa, qarastyrylǵan sýbsıdııa kólemi 3,9 mlrd teńge boldy. ıAǵnı 2,04 mlrd teńge tólenbeı qaldy. Bıyl 31 shildege deıin tasymaldaýshylar 4,266 mlrd teńgeniń jumys kólemin atqarsa, soǵan 2,560 mlrd teńge sýbsıdıa tólendi. Aıyrmashylyq – 1,696 mlrd teńge.
«Tapshylyq máselesin sheshý úshin ońtaıly tarıf – 150 teńge. Alaıda áleýmettik-ekonomıkalyq jaǵdaıdy eskere otyryp, qala ákimdigi qolma-qol aqshasyz jolaqy baǵasyn 100, qolma-qol aqshamen 200 teńgege kóterýdi usyndy. Bul tasymaldaýshylarǵa 859 mln teńge kiris ákeledi. Qalǵan jetpeıtin 2-2,2 mlrd teńgeni sýbsıdııa esebinde qala bıýdjetinen qarastyrýǵa týra keledi. Sonymen qatar qoǵamdyq kólikte jeńildikpen júretin jolaýshylar qatary kóbeıtildi. Jańa tarıf engen kezde zeınetkerler men qulaǵy estimeıtin múgedekter de jolaqyny 50 paıyz jeńildikpen tóleıtin bolady», - dep habarlady vedomstvodan.