Oralda «Qazaqtyń Qadyry» atty jyr músháırasy márege jetti

ORAL. QazAqparat - Oralda aqyn, Memlekettik syılyqtyń laýreaty Qadyr Myrza Álıdiń 85 jyldyǵyna arnalǵan «Qazaqtyń Qadyry» atty oblystyq jyr músháırasy márege jetti, dep habarlaıdy QazAqparat tilshisi.

Qadyr Myrza Álı atyndaǵy oblystyq mádenıet jáne óner ortalyǵy uıymdastyrǵan jastardyń óleń báıgesine barlyǵy 36 úmitker qatysyp, baq synady.

Qazylar alqasynyń sheshimimen oraldyq Aıbol Islamǵalı bas júldeni (100 myń teńge) jeńip aldy.

Jeńimpazǵa júldeni aqyn, Memlekettik syılyqtyń laýreaty, Qazaqstan Jazýshylar odaǵynyń basqarma tóraǵasy Ulyqbek Esdáýlet tapsyrdy.

Sondaı-aq taǵy bir jas talant, jańaqalalyq Márlen Ǵılymhan birinshi orynǵa kóterildi.

Bórlilik Meırambek Sydyq ekinshi, M.Ótemisov atyndaǵy Batys Qazaqstan ýnıversıtetiniń І kýrs stýdenti Ádil Ahmetov pen syrymdyq Baýyrjan Shırmedınuly úshinshi orynǵa ıe boldy.

Arnaıy eki syılyq jańaqalalyq Ernar Jaqsybaev pen aqjaıyqtyq Abylaıhan Maqsutovqa buıyrdy.