Oralda kásipkerdi óltirgen turǵyndar 15 jylǵa sottaldy
Atalmysh sottyń baspasóz qyzmetinen málim etkenindeı, alqabılerdiń kesimi negizinde R.Qojantaev pen T.Amangeldi QR QK 99-baby 2-bóligi 5-7-tarmaqtaryna (asa qatygezdikpen, aldyn ala sóz baılasý arqyly adamdar toby bolyp kisi óltirý) sáıkes aıypty dep tanylyp, árqaısysy 15 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.
Sonymen qatar azamattyq talap aryz ishinara qanaǵattandyrylyp, sottalǵandardan kámeletke tolmaǵan balalarynyń múddesi úshin jábirlenýshiniń paıdasyna árqaısysynan 15 mln teńge moraldyq zalal óndirildi.
Sot talqysynda anyqtalǵanyndaı, ótken jyly 6 tamyzda shamamen saǵat 19.55-te R.Qojantaev óziniń tanysy T.Amangeldimen birge kásipker Erkin Muhanǵalıevti óltirý úshin «Rahat-Lýkým» karaoke-meıramhanasyna barǵan. Sodan keıin E.Muhanǵalıevpen ústel basynda áńgimelesý barysynda Qojantaev ózin kóterińki jalaqyda káýap jasaýshy retinde jumysqa qabyldaýdy talap etken. Jeke bas arazdyǵynan týyndaǵan kelispeýshilikti jeleý etip, ózimen birge ákelgen jınalmaly pyshaǵyn qol sómkesinen shyǵaryp, Muhanǵalıevtiń jandy jerlerine birneshe márte soqqy jasaǵan.
Kásipker ómirin saqtap qalý úshin meıramhananyń terezesin ashyp, syrtqa qaraı qashqan. T.Amangeldi qylmystyq nıetti aıaǵyna deıin jetkizý maqsatynda kólik turaǵynda Muhanǵalıevti qýyp jetip, asa qatygezdikpen kóshede demalyp júrgen adamdardyń kózinshe onyń basynan tepkilegen. Qojantaev olardyń qasyna júgirip kelip, Amangeldiniń pyshaǵyn surap alyp, Muhanǵalıevke taǵy soqqylar jumsaǵan.
Alǵan aýyr dene jaraqattarynan Muhanǵalıev esin jımastan sol jerde kóz jumsa, Qojantaev pen Amangeldi oqıǵa ornynan boı tasalady.
Sottalýshylardyń kinási kýálardyń aıǵaqtarymen, tintý, sóılesý jáne oqıǵa bolǵan jerdi qaraý hattamalarymen, sot-medıtsınalyq saraptama qorytyndylarymen tolyqtaı dálelin tapty.
Úkim kúshine engen joq.
Eske sala keteıik, budan buryn Oralda kásipkerdi óltirgen kúdiktilerdiń ustalǵanyn jazǵan edik.