Oralda kásipkerdi óltirgen sottalýshynyń biri apellıatsııalyq shaǵym túsirdi

ORAL. QazAqparat – Oral qalasynda kásipker Erkin Muhanǵalıevti óltirgen sottalýshynyń biri apellıatsııalyq sotqa júgindi, dep habarlaıdy QazAqparat tilshisi.

Turlan Amangeldi men onyń advokaty alqabıler kesimimen kelispeı, oblystyq sottyń qylmystyq ister jónindegi apellıatsııalyq sot alqasyna shaǵym túsirdi.

BQO sotynyń baspasóz qyzmetinen túsken málimetke qaraǵanda, apellıatsııalyq satydaǵy is 31 mamyr kúngi saǵat 10.00-ge belgilendi.

Eske sala keteıik, budan buryn Oralda kásipkerdi óltirgen kúdiktilerdiń ustalǵanyn jazǵan bolatynbyz.

Sondaı-aq Oralda kásipkerdi óltirgen turǵyndar 15 jylǵa sottaldy.

Alqabılerdiń kesimi negizinde Rýslan Qojantaev pen T.Amangeldi QR QK 99-baby 2-bóligi 5-7-tarmaqtaryna (asa qatygezdikpen, aldyn ala sóz baılasý arqyly bir top adam bolyp kisi óltirý) sáıkes aıypty dep tanylyp, árqaısysy 15 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottalǵan bolatyn.