Oralda Halyq qaharmany Hıýaz Dospanova atyndaǵy kóshe ashyldy

ORAL. QazAqparat – Oralda qazaqtyń tuńǵysh ushqysh qyzy, Halyq qaharmany Hıýaz Dospanova atyndaǵy kóshe ashylyp, ózi oqyǵan keshki mektep ǵımaratyna eskertkish taqta ornatyldy, dep habarlaıdy QazAqparat tilshisi.

Bul saltanatty sharalar batyr qyzdyń 15 mamyr – týǵan kúnine oraılastyryldy.

Aldymen Keńes Odaǵynyń Batyrlary Mánshúk Mámetova, Álııa Moldaǵulova jáne Halyq qaharmany Hıýaz Dospanovaǵa arnalǵan «Qazaqtyń batyr arýlary» músindik kompozıtsııasyna gúl shoqtary qoıyldy.

Saltanatty rásimge qatysqan oblys ákiminiń orynbasary Serik Egizbaevtyń atap ótkenindeı, Hıýaz Dospanovanyń esimi Aq Jaıyq óńirimen tyǵyz baılanysty. Batyr qyz Oral qalasynda turyp, osynda bilim aldy. Al maıdanǵa Jánibek aýdanynan attandy. Mundaı derekterdi keıingi urpaqtyń umytpaýy mańyzdy.

Ekinshi dúnıejúzilik soǵystyń ardageri Hamza Safın Hıýaz Dospanovanyń 17 jasynda Oraldaǵy №1 orta mektepti úzdik bitirip qana qoımaı, qaladaǵy aeroklýbta ushqyshtyq qadamyn bastap, qan maıdanda «qanatty qyz» atanǵanyn tebirene áńgimelep berdi.

«Qazaqtyń qaısar qyzy ushqysh bolamyn dep alǵan betinen qaıtpaı, Máskeýge attandy. Soǵysta dushpannyń úreıin ushyrǵan batyr qyzdardyń janynan tabylyp, 300-den astam

ret áýege kóterildi. Ushaqtan qulap, mert bola da jazdady.

Aýyr jaraqat alsa da, qaıtadan ushaqqa otyrdy. Sóıtip Berlınge deıin jetti. Jeńispen elge oralyp, keıin Almaty qalasynda turdy. Biz qaharman qyzdyń erligin árkez este saqtap, osyndaı sharalardy ótkizip turýymyz kerek», dedi maıdanger.

Eske sala keteıik, budan buryn Oralda 50-den astam kósheniń aty ózgergenin, sonyń ishinde bireýine H.Dospanovanyń esimi berilgenin jazǵan bolatynbyz.