Oralda ekinshi qaıyrymdylyq Grand baly ótkizildi
BQO jastar saıasaty máseleleri basqarmasy men «Aqıqat» jastar pikirsaıys ortalyǵy» qoǵamdyq birlestiginiń qoldaýymen uıymdastyrylǵan sharada Oral qalasy ákiminiń orynbasary Altynbek Qaısaǵalıev oblys basshysy Altaı Kólginovtiń atynan merekemen quttyqtap, jastardy otanshyldyqqa, adamgershilik qundylyqtaryna tárbıeleý men olardyń mádenı deńgeıin kóterýdiń mańyzy zor ekendigin atap kórsetti. Sonyń ishinde osyndaı mádenı sharalar jastardyń basyn qosyp, rýhanı jaǵynan baıýyna septesedi.
Grand bal jobasynyń bas ákimgeri ári uıymdastyrýshysy Alpamys Shárimovtiń aıtýynsha, bıyl sharaǵa qatysýǵa 550-den astam jas tilek bildirgen. Solardyń ishinen 50 jup iriktelinip alynyp, M.Ótemisov atyndaǵy Batys Qazaqstan memlekettik ýnıversıtetiniń bas baletmeısteri, horeograf Qarlyǵash Qadyrbekovanyń jetekshiligimen bir aı boıy bıge jattyqty. Olardyń arasynda túrli mamandyq ıeleri bar.
Bal barysynda 18-29 jas aralyǵyndaǵy 120 úmitker jeti túrli bıden synǵa tústi. Belgili teatr jáne kıno akteri, memlekettik «Daryn» jastar syılyǵynyń ıegeri Asylhan Tólepov, «Oral arýy-2015» baıqaýynyń jeńimpazy Veronıka Zalata, oraldyq shoýmen Sergeı Jýja júrgizgen keshte halyqaralyq «Slavıan bazary» baıqaýynyń bas júldegeri Dımash Qudaıbergenov syndy qazaq estradasynyń juldyzdary óner kórsetti.
Bal sońynda M.Ótemisov atyndaǵy BQMÝ-dyń 4 kýrs stýdentteri Aıdana Jaqsylyqova men Adham Rasýlov úzdik dep tanyldy.
Aıta keteıik, qaıyrymdylyq sharadan jınalǵan qarjy oblystyq kórý qabileti buzylǵan balalarǵa arnalǵan arnaýly mektep-ınternatynyń shákirtterin qoldaýǵa baǵyttalmaq. Osyǵan oraı atalmysh mektep dırektory Arystanbek Ǵubash baldy uıymdastyrýshylarǵa rızashylyǵyn bildirdi.