Oralda dúken órtenip, 20 adam evakýatsııalandy
10:15, 04 Qarasha 2024
<p>ORAL. KAZINFORM – Oral qalasynda Ábilqaıyr han dańǵylynda «Jaıyq» dúkeninde órt boldy.</p>
BQO TJ departamentiniń baspasóz qyzmetinen málim etkenindeı, dúkende azyq-túlik ónimderiniń janyp jatqany jóninde 4 qarasha kúni saǵat 07.48-de habar túsken.
«Dúken bes qabatty turǵyn úıdiń birinshi qabatynda ornalasqan. «Tilsiz jaý» saǵat 08.27-de oqshaýlanyp, 08.41-de aýyzdyqtaldy. Zardap shekkender joq. TJD kúshterimen 20 adam evakýatsııalansa, sonyń tórteýi – balalar. 30 adam turǵyn úıden ózderi shyqty. Órtti sóndirýge jeke quramnan 29 adam, 9 tehnıka jumyldyryldy. Qazirgi kezde oqıǵanyń sebep-saldary, keltirilgen shyǵyn anyqtalý ústinde", dep habarlady vedomstvodan.
Eske sala keteıik, budan buryn Oralda órt bolǵan saýda ortalyǵynan 150 adamnyń syrtqa shyqqanyn jazǵan edik.