Oralda Dinmuhamed Qonaevtyń músini kútimsizdikke ushyrap tur

<p>Oral qalasynda Dinmuhamed Qonaevtyń músini kútimsizdikke ushyrap tur, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

D.Qonaev atyndaǵy qordyń tóraǵasy Nurlan Іzteleýovtiń aıtýynsha, atalmysh músin qazirgi kezde burynǵy «Qazaqstan» kınoteatrynyń mańynda, Ábilqaıyr han dańǵyly boıynda tur.

«Músin tuǵyrynyń mújilip, kútimsizdikke ushyrap turǵany ras. Ol mańda eskertkishti kútimge alatyn mektep te joq. Sondyqtan músindi D.Qonaev atyndaǵy shaǵynaýdandaǵy alańǵa kóshirý jóninde Oral qalasy ákimdigimen kelisilgen edi. Bul máseleni taǵy da naqtylaıtyn bolamyn», dedi N.Іzteleýov.

Oral qalasy ákiminiń baspasóz qyzmetinen málim etkenindeı, Dinmuhamed Qonaevtyń músini Oral qalasy mádenıet jáne tilderdi damytý bóliminiń «Mádenı-aǵartý birlestigi» MKQK teńgeriminde tirkelgen.

«Músinge jaqyn arada jóndeý jumystary júrgiziletin bolady. Sonymen qatar músindi D.Qonaev atyndaǵy shaǵynaýdanda qazirgi ýaqytta jóndelip jatqan alańǵa kóshirý kózdelýde», dep habarlady vedomstvodan.

Aıta keteıik, D.Qonaevtyń músini 2015 jyly ornatylǵan bolatyn.