Oralda «Din jáne áıel» taqyrybynda respýblıkalyq forým ótti
BQO din isteri basqarmasy janyndaǵy din máselelerin zertteý ortalyǵy uıymdastyrǵan forýmnyń maqsaty - otbasylyq qundylyqtardy saqtaı otyryp, qoǵamdy rýhanı damytýdyń joldaryn izdestirý, qazirgi tańdaǵy dindar áıel kelbetin qalyptastyrý, din men dástúr sabaqtastyǵyn aıqyndaý, qyz bala tárbıesi men olardyń quqyqtaryn qorǵaý máselelerin kóterý.
Jıynda aldymen «Qazaqstan - Atyraý» telearnasynyń jýrnalısi Gúldana Abaıqyzy túsirgen «Talaq taǵdyr» atty beınefılm kórsetildi. Onda jat dinı aǵymdardyń jeteginde ketip, aldanǵan qazaq qyzdarynyń taǵdyry baıandalady.
Forýmda sóz alǵan Nur-Múbárak Egıpet ıslam mádenıeti ýnıversıtetiniń baspasóz hatshysy, dintaný ǵylymynyń magıstranty Aısha Keńesbaı destrýktıvti dinı aǵymdardyń qoǵamǵa áseri men zardaptary jóninde baıandap berdi. «Adamdardyń, sonyń ishinde áıelderdiń jat aǵymdardyń arbaýyna túsýiniń basty sebebi óz salt-dástúrin, mádenıetin jáne din negizderin jete bilmeýinen. Turǵyndardyń din máselesindegi saýaty joǵary bolsa ǵana destrýktıvti aǵymdarǵa tosqaýyl qoıýǵa bolady», - dedi Aısha Amanqyzy.
QMDB BQO boıynsha fılıaly quran oqytý bóliminiń ustazy Gúljámılá Ahmetova musylman dinindegi áıel-ananyń róli erekshe ekendigine toqtaldy. Jıynda sondaı-aq QMDB Syrym aýdany boıynsha fılıaly quran oqytý bóliminiń ustazy Ásel Abdýbalı dinniń qoǵamdaǵy mán-mańyzy, qasıetti Quranda mádenı, adamgershilik qundylyqtar jóninde naqty aıtylǵany jóninde baıandap berdi.
Baıandamalardan keıin forým suraq-jaýap túrinde órbidi. Saýaldardyń deni dindar áıelderdiń zaıyrly ortadaǵy orny týraly boldy. Mysaly, mektepterdegi oramal máselesi, talaq, balabaqshalardaǵy ashanalardyń halal bolýy, mindetti ekpeler, joǵary dinı bilim alý jáne basqa ózekti suraqtarǵa shaqyrylǵan qonaqtar tushymdy jaýaptaryn berdi.
Shara sońynda qatysýshylar tarapynan óńirde qyz balalarǵa arnalǵan medrese ashý týraly usynys aıtyldy. Túsken usynystar negizinde forýmnyń qorytyndysy retinde qarar qabyldandy.