Oralda demalys kúnderi UBT tapsyratyn túlekterdi arnaıy kólikter tasymaldaıdy
Onyń atap ótkenindeı, BQO bas memlekettik sanıtar dárigeriniń 23 maýsymdaǵy qaýlysyna sáıkes óńirde qosymsha shekteý sharalary engizilgen bolatyn.
Sonyń ishinde 27-28 maýsym kúnderi Oralda qoǵamdyq kólikter júrmeıdi.
«Osyǵan baılanysty demalys kúnderi M.Ótemisov atyndaǵy Batys Qazaqstan memlekettik ýnıversıteti men Jáńgir han atyndaǵy Batys Qazaqstan agrarlyq-tehnıkalyq ýnıversıtetinde synaq tapsyratyn talapkerlerdi tasymaldaýǵa 16 avtokólik bólindi. Sonymen qatar qalaǵa keletin Báıterek, Tasqala, Terekti aýdandary túlekterin 74 avtokólik jetkizedi. Al qalanyń shetkeri aýmaqtarynda turatyn túlekter basqa kúnderi tapsyrady. Olardyń árqaısysy úshin kólik qarastyrylady», dedi Záýre Bazarǵalıqyzy.
Qazirgi tańda oblysta UBT 9 testileý pýnktinde ótip jatyr. Oǵan barlyǵy 5062 úmitker qatysýǵa ótinish berse, 22 maýsymnan bergi tórt kúnniń ishinde 2041-i synaq tapsyrdy. 22 túlek UBT tapsyrýdan óz erkimen bas tartty. 14 úmitker tyıym salynǵan zattardy alyp ótpek bolǵany úshin testileýge jiberilmedi. Taǵy 10-y UBT erejelerin buzǵany úshin test tapsyrý múmkindiginen aıyrylyp, nátıjeleri joıyldy.
Z.Ǵumarovanyń sózine qaraǵanda, 3 shildede márege jetetin UBT-daǵy baqylaý kúsheıtilgen. Úmitkerlerdi táýelsiz sarapshylar qadaǵalaıdy. Olardyń quramyna arnaıy monıtorıngtik toptar músheleri, qoǵam qaıratkerleri, úkimettik emes uıymdar, sybaılas jemqorlyqqa qarsy qyzmet jáne «Adaldyq alańy» jobalyq keńsesiniń ókilderi kirdi.
«Bıylǵy 25 tamyzǵa deıin ár aýdıtorııadan alynǵan beınejazbalardy mamandar zerdeleıdi. Eger beınematerıaldardy taldaý kezinde erejelerdi buzý anyqtalsa, talapkerdiń test nátıjeleri joıylady. Eger sol kezde qatysýshyǵa grant taǵaıyndalǵan bolsa, onda ol granttan aıyrylady. Sondyqtan shpargalka daıyndaýdyń qajeti joqtyǵyn, tyıym salynǵan zattardy ákelmeý kerektigin taǵy da eskertemiz», dedi Záýre Ǵumarova.
BQO bilim salasyndaǵy sapany qamtamasyz etý departamentiniń basshysy Gúlnár Sársenǵalıeva óńirdegi testileý pýnktterinde monıtorıng júrgizý nátıjesinde sanıtarlyq-epıdemıologııalyq talaptardy buzýshylyqtyń anyqtalmaǵanyn jetkizdi.
«Synaqqa jiberilmegen nemese erejeni buzǵany úshin test tapsyrý múmkindiginen aıyrylǵandar bıyl qańtardaǵy UBT-ǵa qatysqandyǵy týraly sertıfıkaty bolǵan jaǵdaıda aqyly túrde elimizdegi JOO-larǵa qujat tapsyra alady. Sol sekildi óziniń ornyna basqa adamdy kirgizgen talapker de bir jyl boıy UBT-ǵa qatysa almaıdy. Bıyl oblysta mundaı buzýshylyq oryn alǵan joq. Óz jaýabynyń durystyǵyn dáleldegisi keletin túlekter UBT nátıjeleri habarlanǵannan keıin kelesi kúngi saǵat 13.00-ge deıin apellıatsııalyq komıssııaǵa ótinish túsire alady. Komıssııa ony sol túlektiń qatysýymen bir kúnniń ishinde qarastyrady», dedi G.Sársenǵalıeva.
Eske sala keteıik, budan buryn Batys Qazaqstanda demalys kúnderi bazarlar men dámhanalar jabylyp, avtobýstar júrmeıtinin, koronavırýs juqtyrǵandardyń kóbeıýine baılanysty oblys ákiminiń alańdaýshylyq bildirgenin jazǵan bolatynbyz.