Oralda dárihanalarda joq dárilerdi zańsyz satqan turǵyn jaýapqa tartyldy
QR Sybaılas jemqorlyqqa qarsy is-qımyl agenttigi BQO boıynsha departamenti basshysynyń birinshi orynbasary Nurdáýlet Samettiń brıfıngide málim etýinshe, Memleket basshysy Qasym-Jomart Toqaevtyń tapsyrmasyna sáıkes karantın kezinde óńirde farmatsevtıkalyq qyzmettiń durys júzege asyryrylýyn qamtamasyz etý maqsatynda arnaıy monıtorıngtik toptar jumys isteýde.
Atalǵan toptar qala men aýdandarda kúni búginge deıin 300-den astam dárihanaǵa monıtorıng júrgizdi.
Іs-sharalar barysynda zańbuzýshylyq anyqtaldy. Atap aıtqanda, 14 shilde kúni departamentke karantın kezinde bir azamattyń Oral qalasynyń dárihanalarynda joq dári-dármekti (ıngavırın, tseftrıakson, azıtrımıtsın) zańsyz satyp júrgeni týraly aryz tústi.
Sol kúni ótinish berýshiniń qatysýymen atalǵan turǵynnan 5 qorap ıngavırın, 5 qorap azıtrımıtsın jáne 38 ampýla tseftrıakson satyp alyndy. Munyń jalpy quny 66 830 teńgeni qurady.
Materıal QR Ákimshilik quqyqbuzýshylyq kodeksiniń 424 jáne 426-baptaryna sáıkes BQO taýarlar men kórsetiletin qyzmetterdiń sapasy men qaýipsizdigin baqylaý departamentine joldandy.
«Atalǵan azamatqa qatysty eki ákimshilik hattama toltyrylǵan bolatyn. Sonyń nátıjesinde dári-dármekti lıtsenzııasyz satqany úshin oǵan sot sheshimimen aıyppul salyndy. Al tirkelmegen dári-dármekti satý deregi boıynsha is sotta qaralýda», - dedi N.Samet.
Onyń sózine qaraǵanda, sonymen qatar Prezıdenttiń «SQ-Farmatsııa» JShS qyzmetinde sybaılas jemqorlyq táýekelderiniń bolýyna taldaý jasaý týraly tapsyrmasyna sáıkes COVID-19 álemdik pandemııasy kezinde Qazaqstanǵa keletin barlyq gýmanıtarlyq kómektiń sońǵy tutynýshyǵa deıin jetýi baqylanýda.
Qazirgi tańda Katardan, Dúnıejúzilik densaýlyq saqtaý uıymynan, Qytaıdan, Reseı men Ózbekstannan gýmanıtarlyq kómek kelip jetti. Sonyń ishinde «Koronavır» dárisi jáne jeke qorǵanys quraldary bar. Alypsatarlyq derekterin boldyrmaý maqsatynda ár dári-dármek pen jeke qorǵanys quraldary arnaıy «BQO Gýmanıtarlyq kómek Tegin» mórtańbasymen tańbalandy.
«Bul gýmanıtarlyq kómekter BQO sybaılas jemqorlyqqa qarsy qyzmet, «Halyqtyq baqylaý» komıteti, qoǵam ókilderi men eriktilerdiń qatysýymen oblystyq, qalalyq jáne aýdandyq aýrýhanalarǵa, provızorlyq statsıonarlarǵa jetkizilýde», - dedi Nurdáýlet Samet.
Eske sala keteıik, budan buryn Batys Qazaqstanda jasotandyqtardyń dárigerlerge qymyz jetkizip jatqanyn jazǵan bolatynbyz.