Oralda dárihanada zańsyz qyzmet áshkerelenip, 700 myń teńgeniń taýary tárkilendi
BQO polıtsııa departamentiniń qyzmetkerleri adamdardy esirtkige masaıý kúıine túsiretin dári-dármekti zańsyz satý derekterin anyqtaý maqsatynda dárihanalarǵa tekserý júrgizdi.
Departament bastyǵy Maqsuthan Ablazımovtyń aıtýynsha, 11 aqpan kúni dárihanalardyń birinde «baqylap satyp alý» operatsııasyn júrgizý kezinde V. degen azamat ózine tabys etilgen 5 myń teńgege tramadol jáne tropıkamıdti dárigerdiń retseptisinsiz satyp aldy.
«Satýshy 1994 jylǵy Z. degen azamat bolyp shyqty. Osy dárihanany tekserý kezinde 184 plastınka tramadol (10 tabletkalyq), 50 flakon mıdaks (10 ml), 26 flakon tropıkamıd (5 ml) tabylyp, tárkilendi. Alynǵan taýarlardyń quny shamamen 700 myń teńgeni quraıdy. Qazirgi kezde esirtki qylmysyna qarsy is-qımyl basqarmasy osy dári-dármekti kiriske alý boıynsha qujattamalardy zertteý jumystaryn júrgizýde. Sondaı-aq atalǵan dári-dármekterdiń satylǵany jóninde jýrnal tabyldy», dedi departament bastyǵy.
Kúni búgin tergeý amaldary jalǵasýda. Al Z-ǵa qatysty materıal ákimshilik óndiriske bólinip, QR Densaýlyq saqtaý mınıstrligi Medıtsınalyq farmatsevtıkalyq baqylaý komıteti BQO boıynsha departamentine joldanatyn bolady. Olar odan ári QR Ákimshilik quqyqbuzýshylyq kodeksi 426-babyna (farmatsevtıkalyq qyzmettiń jáne dárilik zattar men medıtsınalyq buıymdardyń aınalysy salasynyń qaǵıdalaryn buzý) sáıkes materıaldy sotqa joldaýy tıis.
Sot sheshimi shyqqannan keıin tárkilengen dári-dármekti joıý máselesi qaralatyn bolady.
Eske sala keteıik, budan buryn BQO-da 1,6 mlrd teńge salyqtan jaltarǵan kásipkerge qatysty úkim shyqqanyn jazǵan bolatynbyz.