Oralda bir kúnde 400-den astam talapker UBT tapsyrdy
BQO bilim basqarmasynyń baspasóz qyzmeti málim etkendeı, qala mektepteriniń túlekteri M.Ótemisov atyndaǵy Batys Qazaqstan memlekettik ýnıversıteti men Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń testileý pýnkterinde synaqtan ótti.
Besinshi lekke qatysýy tıis 448 talapkerdiń 10-y óz erkimen test tapsyrýǵa kelmedi. Tyıym salynǵan zattardy alyp ótýge tyrysqany úshin 2 talapker synaqqa jiberilmedi.
Sonymen qatar taǵy ekeýi ruqsat etilmegen zattardy paıdalanǵany úshin aýdıtorııadan shyǵarylyp, test nátıjesi joıyldy.
Bes kúnniń qorytyndysy boıynsha oblysta barlyǵy 2476 úmitker UBT tapsyrdy. Osy kúnderi tártip buzǵan 16 talapker testileýge jiberilmese, 12-si aýdıtorııadan shyǵaryldy.
Taǵy bir eskeretin jaıt, joǵary ball alǵandar keıin jarııa etiledi. Sebebi aýdıtorııadan alynǵan beınejazba 25 tamyzǵa deıin tekseriledi. Sol kezde ereje buzý faktisi anyqtalsa, talapkerdiń test nátıjesi joıylady nemese granttyń kúshi joıylady.
Onyń ishinde joǵary ball alǵandar da bolýy múmkin.
Óńirde UBT 3 shildede aıaqtalady.
Eske sala keteıik, budan buryn Oralda demalys kúnderi UBT tapsyratyn túlekterdi arnaıy kólik tasymaldaıtynyn jazǵan bolatynbyz.