Oralda batys óńirdegi áskerı bólimder komandırleri bas qosty

ORAL. QazAqparat - QR Ulttyq ulany «Batys» óńirlik qolbasshylyǵyna qarasty 5517-áskerı bólim bazasynda elimizdiń batys óńirindegi áskerı bólimder komandırleri men olardyń tárbıe jáne áleýmettik-quqyqtyq jumystar jónindegi orynbasarlarynyń eki kúndik oqý-ádistemelik jıyny ótkizildi, dep habarlaıdy «QazAqparat» tilshisi.

«Batys» óńirlik qolbasshylyǵynyń baspasóz qyzmetinen túsken málimetke qaraǵanda, jıynǵa barlyǵy 15 sardar qatysyp, daıyndyq deńgeılerin kórsetip, tájirıbe almasty.

«Batys» óńirlik qolbasshysy, general-maıor Álibek Serálıevtiń basshylyǵymen óńirlik qolbasshylyq basqarmasynyń sardarlary dárister berip, qatysýshylardyń bilim deńgeıin tekserdi. Ulttyq ulan jaýyngerleri beıbit kezeńde de tolyq áskerı daıyndyqta bolýy tıis. Sondyqtan jıyn kezinde komandırlerdiń asa qaýipti qylmyskerlerdi izdestirý men ustaý boıynsha arnaıy operatsııalar júrgizý  baǵytynda sheshim qabyldaý men josparlaýyna baılanysty biliktilikteri jetildirildi.  Sondaı-aq «Suńqar» oqý polıgonynda sardarlar atys qarýyn qoldaný men dene daıyndyqtary boıynsha synǵa tústi.

Bıylǵy birinshi jartyjyldyqtaǵy áskerı qyzmettiń qorytyndylary  shyǵarylyp, Aqtóbe qalasyndaǵy 6655-áskerı bólimi birinshi, Aqtaýdaǵy 6656-áskerı bólimi ekinshi, Atyraýdaǵy 5546-áskerı bólimi úshinshi orynǵa ıe bolyp, dıplomdarmen marapattaldy.

Jıyn «Batys» óńirlik qolbasshylyǵy áskerı keńesiniń keńeıtilgen májilisimen túıindelip, oǵan qatysqan QR Ulttyq ulany Bas qolbasshysynyń birinshi orynbasary - bas shtab bastyǵy, general-maıor Beıbit Ashkarov jeke quram aldynda turǵan mindetterdi, kadrlardyń kásibı sheberligin udaıy jetildirý qajettigin atap kórsetti.