Oralda balalar úıiniń túlekteri jasóspirimder úıinen kóshpeımiz dep qarsylyq bildirdi

ORAL. QazAqparat - Oral qalasynda «Shańyraq» jasóspirimder úıiniń tárbıelenýshileri kóshýge qarsylyq bildirdi, dep habarlaıdy QazAqparat tilshisi.

«Shańyraq» jasóspirimder úıiniń meńgerýshisi Ómirbaı Qalymbetovtiń aıtýynsha, atalmysh ǵımarat jóndeýge baılanysty tórt aıǵa jabylǵaly otyr.

Onyń sózine qaraǵanda, sol sebepti onda turatyndar ýaqytsha basqa jerge kóshiriledi.

Zań boıynsha «Shańyraq» úıinde jasy 23-ten asqandar turmaýy tıis. Soǵan qaramastan, jetimder bolǵandyqtan kópshiligi - sol jastan asyp ketkender.

Búgin solardyń keıbiri «Biz jóndeý bitkende munda qaıtyp kire almaımyz, kepilhat joq» dep narazylyq tanytty.

Birnesheýi ǵımarattyń tóbesine shyǵyp ketip, ákimder kelgenshe túspeıtinin aıtty.

Oral qalasynyń ákimi Mırjan Satqanov kelip, mán-jaıdy túsindirip, bárine de kepilhat beriletinin jetkizdi.

«Qazirgi kezde kepilhat daıyndalý ústinde. Ýaqyt joǵaltpas úshin «Shańyraqta» turatyndar bul jerden kóshýge tıis. Keıbiri kóship te jatyr», - dedi Ó.Qalymbetov.

Oral qalasynyń ákimi Mırjan Satqanov «Shańyraqtyń» oblystyq bilim basqarmasynyń teńgeriminde ekenin, onda turatyndarǵa ýaqytsha jataqhana men lagerden oryn beriletinin, jóndeý bitkennen keıin bári keri oralatynyn jetkizdi.