Oralda ajyrasýǵa aryz bergen áıeliniń ıntımdik sýretterin taratqan turǵyn sottaldy

<p>ORAL. KAZINFORM &ndash; Oral qalalyq sotynda QR QK 194-baby 1-bóligi (bopsalaý) jáne 147-baby 5-bóligi (jeke ómirge qol suǵylmaýshylyqty buzý) boıynsha aıyptalǵan A-ǵa qatysty qylmystyq iske núkte qoıyldy.</p>

BQO sotynyń baspasóz qyzmetinen málim etkenindeı, A. atalǵan baptarǵa sáıkes aıypty dep tanylyp, ol 3 jyl 2 aıǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.

Sot talqysynda anyqtalǵanyndaı, sottalýshy A. men B. zańdy nekede turǵan. Birge ómir súrgen ýaqytta B. Whatsapp messendjeri arqyly kúıeýi A-nyń ótinishi boıynsha oǵan ıntımdik sıpattaǵy fotosýretti óz erkimen jibergen.

«Keıinirek aralaryndaǵy kelispeýshilikterdi eskere otyryp, B. sotqa nekeni buzý týraly aryz bergen kezde, oǵan A. kelispegen. Sóıtip B-ny masqara etetin ıntımdik sıpattaǵy fotosýretterin taratamyn dep qorqytyp, odan aqsha talap ete bastaǵan. Aqyry A. óziniń uıaly telefonynan B-nyń ákesiniń uıaly telefonyna, sondaı-aq Whatsapp messendjerindegi jalpy topqa odan buryn alynǵan ıntımdik sıpattaǵy fotosýretterdi jibergen. Osylaısha, B-nyń jeke ómiri týraly qupııa málimetterdi onyń kelisiminsiz taratqan», dep habarlady vedomstvodan.

Úkim zańdy kúshine engen joq.

Eske sala keteıik, budan buryn Oralda jarylys bolǵan kafeni jalǵa alýshyǵa qatysty úkim shyqqanyn jazǵan bolatynbyz.