Oralda áıeldi tonap jatqan er adam vıdeoǵa túsip qaldy

ORAL. QazAqparat – Oralda áıeldi tonaǵan er adam beınebaqylaýǵa túsip qaldy, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, oqıǵa 16 mamyr kúni boldy.

Tańǵy mezgilde «Omega» zaýyty aýdanyndaǵy avtojol kópiriniń astynan qannen-qapersiz ótip bara jatqan 30 jastaǵy áıelge kútpegen jerden er adam shabýyl jasaǵan.

Áıel qashyp ketýge tyrysqanymen, qaraqshy ony myqtap ustap, jerge qulatyp, altyn syrǵa, saqınalaryn sheship, telefonyn tartyp alǵan.

Kelgen zalal kólemi – 550 myń teńge.

«Áıel adam polıtsııaǵa júginip, jedel izdestirý is-sharalary birden jarııalandy. Tergeý áreketterin júrgizý barysynda usynylǵan 15 azamattyń ishinen jábirlenýshi 1971 jyly týǵan er adamdy kórsetti. Kúdikti dereý quryqtaldy. Onyń buryn qylmystyqqa jaýapkershilikke tartylǵany anyqtaldy. Qazirgi kezde QR QK 191-baby 2-bóligine (tonaý) sáıkes sotqa deıingi tergeý amaldary júrgizilip jatyr. Bul bap boıynsha aıypty dep tanylǵan adam múlki tárkilenip, úsh jyldan jeti jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady», dep habarlady vedomstvodan.

Eske sala keteıik, budan buryn Oralda kásipkerdi óltirgen sottalýshynyń biri apellıatsııalyq shaǵym túsirgenin jazǵan bolatynbyz.

Sondaı-aq Oralda para aldy dep aıyptalǵan polıtsııa sheneýnigi 5 jylǵa sottaldy.