Oralda avtokólikke soǵylǵan mototsıkl jolaýshysy kóz jumdy
BQO polıtsııa departamentiniń baspasóz qyzmetinen málim etkenindeı, oqıǵa 20 qyrkúıek kúni ıÝ.Gagarın kóshesi boıynda boldy.
«Saǵat 02.30-da 1976 jylǵy júrgizýshi «Lada 21723» avtokóligimen solǵa qaraı burylý kezinde 18 jastaǵy jigit aıdap kele jatqan «Yamaha» mototsıkline jol bermeı, soqtyǵysqan. Sonyń saldarynan qalalyq kópbeıindi aýrýhanaǵa jetkizilgen mototsıklde otyrǵan 2004 jylǵy jigit 21 qyrkúıek kúni saǵat 01.40-ta esin jııa almastan, jansaqtaý bóliminde kóz jumdy. Kólik quraldary arnaıy turaqqa qoıyldy. Atalǵan derek boıynsha QR QK 345-baby 3-bóligine sáıkes sotqa deıingi tergeý amaldary júrgizilýde» dep habarlady vedomstvodan.
Departamentten túsken málimetke qaraǵanda, marqum mototsıkl jolaýshysy bola tura, qorǵanys motoshlemin kımegen.
Sońǵy kezde oblysta mototsıklder men mopedtiń júrgizýshileri men jolaýshylary arasynda jeke qorǵanys quraldaryn kımeı, jol-kólik oqıǵalaryna ushyraý derekteri jıilep otyr.
Osynyń aldynda Báıterek aýdanynda jas qyz ben Oral qalasynda moped júrgizýshisi mert boldy.
Jalpy, jyl basynan beri motokóliktiń qatysýymen 26 jol apaty tirkelip, sonyń saldarynan 7 adam qaza taýyp, 22-si túrli jaraqat aldy.
Motokólikti paıdalaný erejelerin buzý deregi boıynsha 60 moped pen mototsıkl arnaıy turaqqa qoıylyp, shlem kımegeni úshin 10 júrgizýshi ákimshilik jaýapkershilikke tartyldy.
Motoshlem kııý kóp jaǵdaıda aýyr jaraqattardyń aldyn alyp, aman qalýǵa septesedi.
Atap aıtqanda, shlem qoldaný bas jaraqatyn alýdy 48, aýyr bas jaraqatyn 60, bas-mı jaraqatyn 53, betin jaraqattaýdy 23 paıyzǵa azaıtar edi.
Sondyqtan BQO polıtsııa departamenti mototsıkl men moped júrgizgen kezde motoshlem qoldaný qajettigin eske salady.
Eske sala keteıik, budan buryn BQO-da 4 adam qaza tapqan jol apatynan keıin bir jigittiń jansaqtaý bóliminde jatqanyn jazǵan bolatynbyz.