Oralda avtoHQO-da emtıhan tapsyratyndar bıometrııa arqyly tekseriledi

ORAL. QazAqparat – Oral qalasy boıynsha mamandandyrylǵan halyqqa qyzmet kórsetý bóliminde júrgizýshi kýáligin alýshylarǵa teorııalyq emtıhan tapsyrý kezinde bıometrııa júıesi engizildi, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy BQO boıynsha fılıalynyń dırektory Nádir Qurymbaevtyń aıtýynsha, bul – adamnyń biregeı jeke derekterin bet-júzi arqyly taný júıesi.

Onyń sózine qaraǵanda, atalmysh júıe alaıaqtyq jáne sybaılas jemqorlyq táýekelderin azaıtýǵa múmkindik beredi.

«Júrgizýshi kýáligin alýshylar óte kóp. Mysaly, ótken jyly oblysta 47 myńnan astam adam júrgizýshi kýáligin aldy. Buryn teorııalyq emtıhandy tapsyrar aldynda klıent tek jeke kýáligin kórsetetin. Endi árbir ústeldiń ústinde emtıhan tapsyrýshynyń sol adam ekenin anyqtaıtyn beınekamera ornatyldy», dedi N.Qurymbaev.

Fılıaldyń baspasóz qyzmeti málim etkendeı, júrgizýshi kýáligin alý úshin 073 úlgidegi medıtsınalyq anyqtama kerek. Medıtsınalyq tekserýden mamandandyrylǵan bólim ǵımaratynda ornalasqan medıtsınalyq kabınet, psıhıatr jáne narkologtan ótýge bolady.

Júrgizýshi kýáligine emtıhan tapsyrý eki kezeńnen turady, biri – teorııalyq emtıhan, ekinshisi – praktıkalyq. Teorııalyq emtıhanda 40 suraqtyń keminde 32-sine durys jaýap berilýi tıis. Al praktıkalyq emtıhan kezinde 12 jattyǵýdan turatyn avtodromdaǵy syzba arqyly júrip ótý qajet.