Oralda avtobýs pen jeńil kólik soqtyǵysyp, 18 jastaǵy júrgizýshi qaza tapty

ORAL. QazAqparat – Oral qalasynda avtobýs pen jeńil kólik soqtyǵysyp, 18 jastaǵy júrgizýshi qaza tapty, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, oqıǵa 8 maýsym kúni saǵat 18.35-te boldy.

Jáńgir han kóshesinde №7 baǵytta júretin avtobýs pen «Lada Kalına» avtokóligi túıisti.

Sonyń saldarynan jeńil kóliktiń 18 jastaǵy júrgizýshisi oqıǵa ornynda kóz jumdy. Atalǵan derek boıynsha QR QK 345-baby 3-bóligine sáıkes sotqa deıingi tergeý amaldary bastaldy.

BQO densaýlyq saqtaý basqarmasynyń baspasóz qyzmetinen naqtylaǵanyndaı, jedel járdem saǵat 18.48-de shaqyryldy. Oqıǵa ornynda jas jigit mert boldy.

BQO TJ departamenti baspasóz qyzmetiniń tolyqtyrýynsha, oqıǵa ornyna qutqarýshylar da bardy. Olar jeńil avtokólikte qystyrylyp qalǵan marqum júrgizýshiniń múrdesyn shyǵardy.

Eske sala keteıik, budan buryn Batys Qazaqstanda avtokólik aýdarylyp, eki adamnyń kóz jumǵanyn jazǵan bolatynbyz.

Sondaı-aq Aqsaı qalasynda 9-qabattan qulaǵan er adam mert boldy.