Oralda aýlasyn sý basqany jóninde turǵyndardan 600-ge jýyq ótinish túsken
Oral qalasy ákiminiń orynbasary Jandos Dúısenǵalıevtiń brıfıngide málim etkenindeı, qalalyq shtabtyń jedel jelisine turǵyndardan aýlasyn sý basý týraly 249 mekenjaı boıynsha 600-ge jýyq ótinish túsken.
Jandos Ashatulynyń sózine qaraǵanda, ótinishter kóbinese Zachagan, Derkól kentterinen, jeke turǵyn úı sektorlarynan túsýde. Atap aıtqanda, Zachagan kentinde Kóktem, Keń dala shaǵyn aýdandary, Naryn, Baıan sulý, Shuǵyla, Jeruıyq, Derkólde Shákárim, Maıqy bı, Baızaqov, Maılın, Abylaı han, Qaldaıaqov, Sovet kósheleri jáne 2-jumysshy, Eski áýejaı shaǵyn aýdandary. Ótinishter boıynsha qala ákimdiginiń qyzmetkerleri orynǵa shyǵyp, jaǵdaıdy baǵamdap, qajetti is-sharalardy qabyldap jatyr.
«Qazirgi ýaqytta qala boıynsha barlyq kommýnaldyq júıe qalypty jumys istep tur. Káriz kollektorlarynyń erigen qar sýymen tolyp ketýine jáne turǵyn úı alaptaryn sarqyndy jáne erigen sý basý qaýpine baılanysty qala boıynsha sý berý qysymy tómendeýi múmkin. Eski áýejaı jáne Zachagan kentiniń Kirpish zaýyty aýdanynda 750 abonent ýaqytsha jaryqsyz qaldy. Apattyq brıgada jaryqty qalypqa keltirý jumysyn júrgizýde. Jaryqty saǵat 13.00-de berý kózdelýde», - dedi J.Dúısenǵalıev.
Onyń aıtýynsha, sý tasqyny kezeńi bastalǵaly 30 367 tekshe metr qar sýy sorylyp, jyl basynan beri 679 myń tekshe metr qar qala aýmaǵynan shyǵarylǵan.
Sý tasqynynyń aldyn alý jumystaryna sý soratyn 70 tehnıka tartyldy. Búginnen bastap onyń sany 100-den aspaq. Sondaı-aq 108 qosymsha tehnıka iske qosyldy. 18 myń qumdy qapshyq daıyndalyp, qajetti jerlerge jetkizilýde.
Oral qalasy bıýdjeti esebinen jergilikti atqarýshy organdardyń rezervinen tabıǵı jáne tehnogendik sıpattaǵy tótenshe jaǵdaılardy joıýǵa 185 mln 738 myń teńge kóleminde qarajat bólindi.
«Tótenshe jaǵdaı bolǵan jaǵdaıda turǵyndardy evakýatsııalaý úshin qala boıynsha 27 pýnkt ázirlendi. Sonymen qatar sý basý qaýpi tóngen jaǵdaıda halyqty ornalastyrý úshin 3 mádenıet úıi, 1 sport kesheni jáne Zachagan kentindegi Aqan seri 47/1 mekenjaıy boıynsha salynǵan 9 qabatty úıdiń birinshi qabatyndaǵy oryndar belgilendi (barlyǵy 700 oryn) jáne zardap shekkenderdi ýaqytsha ornalastyrý úshin oblys ortalyǵyndaǵy 6 qonaqúı keshenderimen nıet-sharttar jasaldy. Odan bólek, qalamyzda ornalasqan týrıstik lagerler jáne sport nysandarynyń tizimi jasaqtaldy. Jaıyq, Shaǵan, Derkól ózenderi tasyp, saıajaılardy sý basqan jaǵdaıda turǵyndardy sol nysandarǵa ornalastyrý josparlanýda», - dedi J.Dúısenǵalıev.
Eske sala keteıik, budan buryn Oral qalasynyń kósheleri sýǵa tola bastaǵanyn jazǵan bolatynbyz.