Oralda «Atameken» óner ordasy ashyldy
Onyń saltanatty ashylý rásimine qatysqan QR Premer-Mınıstriniń orynbasary Eraly Toǵjanov elimizde áleýmettik salada Memleket basshysy Qasym-Jomart Toqaevtyń Qazaqstan halqyna arnaǵan Joldaýyna sáıkes kóptegen is-sharalardyń qolǵa alynyp jatyrǵanyn atap ótti.
«Sonyń ishinde «Atameken» óner ordasynyń ashylýy – eldiń mádenı ómirindegi aıtýly oqıǵalardyń biri. Alystan qaraǵannyń ózinde júregińdi baýrap alatyn osyndaı eńseli ǵımarattyń boı kóterýi – Táýelsizdigimizdiń arqasy. Egemendiktiń arqasynda qazaqtyń salty da, dástúri de qaıta kóterildi. Táýelsizdik alǵannan bergi kezeńde Oralda Hadısha Bókeeva atyndaǵy qazaq drama teatry, Qadyr Myrza Álı atyndaǵy mádenıet jáne óner ortalyǵy syndy kórikti ǵımarattar salyndy. Munyń bári - eldiktiń, birliktiń arqasy, Elbasy Nursultan Nazarbaev bastap, halqymyz qoldap, birlesip atqarǵan jumystardyń nátıjesi. Jýyrda Qasym-Jomart Kemeluly óneri órkendegen eldiń ozatyny jóninde atap ótken bolatyn. Osyndaı óner ordasy arqasynda eldiń rýhy kóteriledi, namysy asqaqtaı túsedi», dedi E.Toǵjanov.
Aq Jaıyqtyń zııaly qaýym ókilderi atynan belgili aqyn, Memlekettik syılyqtyń ıegeri Aqushtap Baqtygereeva sóz aldy.
«Aleksandr Zataevıchtiń «Maǵan búkil qazaq dalasy án salyp turǵandaı kórinedi» degenindeı, búgin barsha Aq Jaıyq óńiri án salyp turǵandaı. Osy jerde uly Qurmanǵazy kúıshiniń izi jatyr. Eger Qurmanǵazyǵa eýropalyq bilim berse, Bethoven, Paganınılermen qatar turar edi-aý degen sózderdi tyńdadyq. Egemendiktiń arqasynda uly dala ul-qyzynyń daýsyn kúlli álem estidi. Kemeńger jazýshymyz Ábishtiń aıtqanyndaı, qazaqtyń Venasy atanǵan Oralda osyndaı saltanatty óner ortalyǵynyń ashylýyna jettik. Búgin – talaı adamnyń armany oryndalǵan kún», dedi A.Baqtygereeva.
«QPO b.v.» kompanııasynyń bas dırektory Djankarlo Rýıý jurtshylyqty Oralda osyndaı mádenıet saraıynyń ashylýymen quttyqtap, izgi tilegin jetkizdi.
Budan keıin meımandar «Atameken» óner ordasyna kirip, zal, bólmelerimen tanysty.
Kórermender Aıman Musaqojaeva, Birjan Hasanǵalıev, Dına Hamzına jáne basqa óner maıtalmandary qatysqan «Asqaq Atameken» atty kontserttik baǵdarlamany tamashalady.
«Atameken» óner ordasy «QPO b.v.» kompanııasynyń áleýmettik ınvestıtsııalary esebinen salyndy. Quny – 9,5 mlrd jýyq teńge. Bas merdigeri – «Altaır» JShS.
20 myńǵa jýyq sharshy metrdi alyp jatqan úsh qabatty ǵımarattyń akt zaly 926 adamǵa eseptelgen. Budan basqa kórme zaly, jınalys ótkizetin, sondaı-aq konferents-zal da bar.
Taǵy bir ereksheligi, sahna 360 gradýsqa burylady. Onda orkestr otyratyn arnaıy oryn da bar.